काठमाडौं ६ माघ । नेपाली कांग्रेसले प्रतिनिधिसभा सदस्य मुक्ताकुमारी यादवलाई उपसभामुखको उम्मेदवार बनाउने भएको छ।

सभापति शेरबहादुर देउवा निवास धुम्बाराहीमा शुक्रबार बसेको संसदीय दलको कार्यसमिति बैठकले यादवलाई उपसभामुखको उम्मेदवार बनाउने निष्कर्ष निकालेको हो।

बैठकमा सहभागी एक नेता निकट स्रोतले समानुपातिक सांसद यादवलाई उपसभामुखको उम्मेदवार बनाउने सम्भावना रहेको जानकारी दिएको छ।

बैठकमा सहभागी राष्ट्रियसभा संसदीय दलका नेता रमेशजंग रायमाझीले भने निर्णय भइनसकेको प्रतिक्रिया दिए।

‘दिउँसो २ बजेपछि निर्णयमा पुग्छौं,’ उनले नेपालखबरसँग भने, ‘अहिले निर्णय भइसकेको छैन।’

मुख्य ससचेतक रमेश लेखकले पनि उपसभामुखको उम्मेदवारका विषयमा निर्णय भइनसकेको बताए।

‘उपसभामुखको उम्मेदवारका लागि अरु पार्टीसँग पनि छलफल गरिराखेका छौं,’ बैठकपछि मुख्य सचेतक लेखकले भने, ‘एक डेढ बजेभित्र तय गर्छौं।’