मुम्बइ, १२ माघ । क्रिकेटर केएल राहुल र अभिनेत्री अथिया शेट्टी गत सोमबार वैवाहिक जीवनमा बाँधिए । जोडीको वैवाहिक फोटो र भिडियो सामाजिक सञ्जालमा भाइरल भइरहेको छ । यो जोडीले विवाहमा करोडौँ रुपैयाँको उपहार पाएका छन् । उनीहरुको उपहारको कुल मूल्य यति धेरै छ कि त्यति पैसा कमाउन जोकोहीलाई जुगौं लाग्छ ।

अथिया र केएलले परिवार, साथीभाइ र आफन्तबाट बिलासी उपहार पाएका छन् । उनीहरुलाई अभिनेता सलमान खानले १.६४ करोड रुपैयाँको ओडी कार दिएका छन् । अथियाका अभिनेता पिता सुनील शेट्टीले एक लेविश अपार्टमेन्ट दिएका छन् । जसको मूल्य करिब ५० करोड रुपैयाँ पर्छ ।

त्यस्तै, सुनीलको मिल्ने साथी ज्याकी श्राफले ३० लाख रुपैयाँको घडी उपहार दिएका छन् । अथियाको नजिकका साथी अर्जुन कपुरले डायमण्ड ब्रासलेट दिएका छन् । जसको मूल्य डेढ करोड पर्छ ।

त्यस्तै, क्रिकेटर केएललाई अर्का क्रिकेटर विराट कोहलीले २.१७ करोड रुपैयाँको बिएमडब्ल्यू कार दिएका छन् । महेन्द्रसिंह धोनीले केएललाई ८० लाख रुपैयाँको कावासाकी निन्जा बाइक दिएका छन् ।