काठमाडौँ, १९ माघ । परराष्ट्रमन्त्री बिमला राई पौड्याल आज श्रीलंका जाँदै छिन् । श्रीलंकाको ७५औँ स्वतन्त्र दिवसको अवसरमा श्रीलंकाका परराष्ट्रमन्त्री एमयुएमअली साबरीको मैत्रीपूर्ण निमन्त्रणामा पौड्याल त्यसतर्फ प्रस्थान गर्न लागेकी हुन् ।

श्रीलंका भ्रमणमा राजनीतिक भेटघाट र राजनीतिक महत्वका अवसरहरूमा सहभागी हुने कार्यक्रम रहेको परराष्ट्र मन्त्रालयले जनाएको छ ।

उनले श्रीलंका भ्रमणका क्रममा सार्कको बारेमा पनि साइडलाइन कुराकानी सम्भव भएसम्म गर्ने बताइन् ।

शुक्रबार समकक्षीसँग भेटवार्ता गर्ने कार्यक्रम रहेको र त्यही दिन स्वागत लन्चको कार्यक्रम राखिएको उनले बताइन् । सोही दिन मन्त्री पौड्यालले श्रीलंकाका प्रधानमन्त्री दिनेश गुणवर्द्धनेसँग भेटघाट गर्ने कार्यक्रम छ ।

बेलायती उपनिवेशबाट स्वतन्त्र भएको ७५औँ वर्षगाँठका अवसरमा श्रीलंका सरकारले आयोजना गर्ने विशेष समारोहमा सहभागी भइसकेपछि त्यसैदिन मन्त्री पौड्यालले श्रीलंकाका राष्ट्रपति रनिल विक्रमासिंघेसँग भेटवार्ता गर्ने कार्यक्रम छ ।

मन्त्री पौड्याल माघ २५ गते काठमाडौँ फर्कने कार्यक्रम रहेको मन्त्रालयले जनाएको छ ।