एजेन्सी, २६ माघ । रियल मड्रिड फिफा क्लब विश्वकपको फाइनलमा प्रवेश गरेको छ । मोरक्कोमा गएराति भएको सेमिफाइनलमा इजिप्टको अल आलीमाथि४–१ गोल अन्तरको सहज जित निकाल्दै मड्रिड उपाधि नजिक पुगेको हो ।

केही मुख्य खेलाडी बिना नै उत्रिएको मड्रिडले ४२औँ मिनेटमा भिनिसियस जुनियरको गोलमार्फत अग्रता लियो । पहिलो हाफमा १–० गोलको अग्रता लिएको मड्रिडले दोस्रो हाफमा थप ३ गोल गर्‍यो ।

खेलको ४६औँ मिनेटमा फेडेरिक भाल्भर्डेले गोल गर्दै मड्रिडको अग्रता दोब्बर पारे । ६५औँ मिनेटमा अल आलीले खेलमा फर्कने प्रयास गर्‍यो । अली मालोउलले पेनाल्टीमार्फत् गोल गर्दै अग्रता २–१मा झारेको थियो ।

खेलको ८७औँ मिनेटमा मड्रिडले अग्रता बढाउने मौका गुमायो । लुका मोड्रिच पेनाल्टीमा चुक्दा मड्रिडले खेलमा ३–१ को अग्रता लिने मौका गुमायो । मोड्रिचको प्रहार अल आलीका गोलरक्षक मोहम्मद अल सेवानीले बचाए ।

तर, खेलको इन्जुरी समयमा रोड्रिगोले गोल गर्दै मड्रिडले अग्रता ३–१ मा पुर्‍यायो । लगत्तै वैकल्पिक खेलाडी सर्जियो आरिबासले गोल गर्दै मड्रिडलाइ ४–१ को स्पष्ट जित दिलाए ।

मड्रिडले अब शनिबार उपाधिका लागि साउदी अरेबियाको अल हिलालसँग प्रतिस्पर्धा गर्ने छ । अल हिलाल ब्राजिलको फ्लामियालाई हराउँदै फाइनलमा पुगेको हो ।