काठमाडौँ, २९ माघ । रियल मड्रिड फिफा क्लब विश्वकप च्याम्पियन बनेको छ । साउदी अरेबियाको अल हिलालमाथि ५–३ गोल अन्तरको जित निकाल्दै स्पेनिस क्लब मड्रिड पाँचौँपटक क्लब विश्वकपको च्याम्पियन बनेको हो ।

मोरक्कोको रावतस्थित स्टेड प्रिन्स मोउले अब्दल्लाहमा शनिबार राति मड्रिडलाई च्याम्पियन बनाउन भिनिसियर जुनियर र फेडे भाल्भेर्डेले २–२ तथा कप्तान करिम बेन्जेमाले एक गोल गरे । अल हिलालका लुसियानो डारियो भिट्टोले दुई तथा मोउसा मारेगाले एक गोल गरेका थिए ।

यस सिजन मड्रिडले जितेको यो दोस्रो उपाधि हो । अगस्टमा मड्रिडले युरोपेली सुपरकप जितेको थियो ।

खेलको १३औँ मिनेटमा भिनिसियसले गोल गर्दै मड्रिडलाई सुरूवाती अग्रता दिलाएका थिए । १८औँ मिनेटमा फेडे भाल्भेर्डेले गोल गर्दै मड्रिडको अग्रता दोब्बर पारे ।

२६औँ मिनेटमा अल हिलालका मोउसा मारेगाले गोल गरेपछि पहिलो हाफ २–१ को स्थितिमा पुर्‍याए ।

५४औँ मिनेटमा कप्तान करिम बेन्जेमाले गोल गर्दै रियललाई ३–१ ले अघि बढाए । ५८औँ मिनेटमा फेडे भाल्भेर्डेले व्यक्तिगत दोस्रो तथा टोलीका लागि चौथो गोल गर्दै मड्रिडलाई ४–१ को स्थितिमा पुर्‍याए ।

६३औँ मिनेटमा लुसियानो डारियो भिट्टोले गोल गर्दै अल हिलाललाई खेलमा फर्कने संकेत दिए । तर, ६९औँ मिनेटमा भिनिसियसले व्यक्तिगत दोस्रो तथा टोलीका लागि पाँचौँ गोल गरे ।

७९औँ मिनेटमा लुसियानो डारियो भिट्टलो व्यक्तिगत दोस्रो तथा टोलीका लागि तेस्रो गोल गरे पनि टोलीलाई हारबाट जोगाउन सकेनन् ।

पछिल्ला १० संस्करण युरोपियन क्लबले मात्रै क्लब विश्वकपको उपाधि जितेका छन् । उपाधि नजिक पुगेको अल हिलाल क्लब विश्वकप जित्ने पहिलो एसियाली टोली बन्न चुकेको छ ।

पाँचौँ पटक फाइनल पुगेको मड्रिड पाँचैपटक च्याम्पियन बनेको हो । यसअघि, सन् २०१४, २०१६, २०१७ र २०१८ मा उपाधि जितेको थियो ।