काठमाडौँ, ४ फागुन । स्पेनिस ला लिगाअन्तर्गत गएराति सम्पन्न खेलमा रियल मड्रिडले पराकिलो जित निकालेको छ ।

घरेलु मैदान सान्टियागो बर्नेबेउमा सम्पन्न खेलमा घरेलु टोली मड्रिडले एल्चेमाथि ४–० गोलको फराकिलो जित निकालेको हो । मड्रिडको जितमा कप्तान करिम बेन्जेमाले दुई तथा मार्को एसेन्सियो र लुका मोड्रिचले समान एक–एका गोल गरे ।

खेलको ८औँ मिनेटमा मार्को एसेन्सियाको गोलबाट मड्रिडले खेलमा १–०को अग्रता लिन सफल भएको थियो । उनले ड्यानी कार्भाजलको पासमा ४ खेलाडीबीचबाट सुन्दर गोल गर्न सफल भएका थिए ।

३१औँ मिनेटमा कप्तान बेन्जेमाले गोल गर्दै मड्रिडको अग्रता दोब्बर पारे । क्रसबाट आएको पासलाई बेन्जेमाले हेडर प्रयास गर्दा एन्जो रोकोले ह्यान्ड गर्न पुगेपछि रेफ्रीले पेनाल्टी प्रदान गर्दा बेन्जेमा चुकेनन् । पहिलो हाफको इन्जुरी समयको थप गरिएको पहिलो मिनेटमा बेन्जेमाले पुनः पेनाल्टीमा गोल गरेपछि मड्रिडले पहिलो हाफमा ३–०को अग्रता लिन सफल भयो ।

त्यस्तै, ६८औँ मिनेटमा ड्यानियल सेवालोसको स्थानमा मैदान छिरेका लुका मोड्रिचले ८०औँ मिनेटमा मड्रिडका लागि चौथो गोल गरे ।

जितसँगै २१ खेलबाट ४८ अंक जोडेर मड्रिड अंक तालिकाको दोस्रो स्थानमा छ । शीर्ष स्थानमा समान खेलबाट ५६ अंक जोडेको बार्सिलोना छ । पराजित एल्चे भने ९ अंकसहित पुछारमा छ ।