काठमाडौँ, ६ फागुन । आइसिसी विश्वकप क्रिकेट लिग–२ अन्तर्गत घरेलु मैदानमा भइरहेको त्रिदेशीय एकदिवसीय अन्तर्राष्ट्रिय श्रृंखलाको तेस्रो खेलमा नेपालले नामिबियाविरूद्ध टस जितेर पहिले बलिङ रोजेको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा केहीबेरमा खेल सुरू हुने छ । नेपाल लतातार तेस्रो जितको खोजीमा हुने छ भने नामिबिया नेपाल भ्रमणमा पहिलो जित निकाल्ने लक्ष्यका साथ मैदान उत्रने छ ।

सुरूवाती दुई खेलमा सानदार जित हात पारेको नेपालको मनोबल उच्च छ । नेपाल त्यहिँ नतिजालाई निरन्तरता दिँदै एकदिवसीय मान्यता मजबुत बनाउन चाहन्छ ।

नेपालले पहिलो खेलमा नामिबियालाई २ विकेटले पराजित गरेको थियो । २८६ रनको विजयी लक्ष्य पूरा गर्दै नेपालले इतिहास रचेको थियो । जुन योगफल नेपालले पूरा गरेको गरेको सर्वाधिक ठुलो योगफल थियो ।

शुक्रबार दोस्रो खेलमा नेपालले स्कटल्यान्डलाई ३ विकेटले पराजित गरेको थियो ।

नेपाल २६ खेलबाट १० मा जित र १४ हारसहित २२ अंकका साथ छैटौँ स्थानमा छ । नेपाल शीर्ष तीनमा पर्न बाँकी १० खेल जित्नैपर्ने हुन्छ । एकदिवसीय मान्यता जोगाउन नेपालले कम्तिमा ७ खेल जित्नुपर्ने हुन्छ ।

उता नामिबिया ३२ खेलमा १८ मा जित र १३ मा हारसहित ३७ अंकका साथ तेस्रो स्थानमा छ । शीर्ष ३ मा रहँदै सोझै ग्लोबल छनोट खेल्न नामिबियालाई बाँकी खेल जित्नुपर्ने दबाब छ ।