काठमाडौँ, ९ फागुन । आइसिसी विश्वकप क्रिकेट लिग–२ एकदिवसीय श्रृंखलाअन्तर्गत नेपालले स्कटल्यान्डविरूद्ध टस जितेर पहिले फिल्डिङ गर्ने निर्णय लिएको छ । त्रिवि अन्तर्राष्ट्रिय क्रिकेट मैदानमा नेपालका कप्तान रोहित पौडेलले टस जितेर पहिला बलिङ गर्ने निर्णय लिएका हुन् ।

नेपालले आजको खेलमा एक परिवर्तन गरेको छ । तीव्र गतिका बलर गुलशन झाको स्थामा ललितनारायण राजवंशीलाई मौका दिएको छ ।

आजको खेल जितेमा नेपाललाई शीर्ष पाँचमा रहँदै एकदिवसीय मान्यता जोगाउन सहज हुने छ ।

उता स्कटल्यान्डको लिग–२ मा यो अन्तिम खेल हो । पहिलो खेलमा नामाबियालाई १० विकेटले हराउँदै तीन खेल अगावै च्याम्पियन बनेको थियो । नेपालसँगको खेलपछि स्कटल्यान्डले उपाधि ट्रफी त्रिवि मैदानमै पाउने छ ।

पहिलो खेलमा स्कटल्यान्ड नेपालसँग तीन विकेटले पराजित भएको थियो । स्कटल्यान्डले प्रस्तुत गरेको २७५ रनको विजयी लक्ष्य नेपालले ४७ ओभरमा ७ विकेट गुमाउँदै पूरा गरेको थियो ।

स्कटल्यान्ड ३५ खेलमा २४ जित र ९ मा हारसहित ५० अंकका साथ शीर्ष स्थानमा छ । नेपाल २७ खेलमा ११ मा जित र १४ मा हारसहित २४ अंकका साथ छैटौँ स्थानमा छ ।

यदि नेपालले बाँकी सबै ९ खेल जितेको खण्डमा ४२ अंकका साथ शीर्ष तीनमा रहँदै सोझै जुन–जुलाईमा जिम्बाब्वेमा हुने एकदिवसीय विश्वकप छनोट खेल्ने पाउने छ । शीर्ष तीनमा पर्न नसके प्लेअफ क्वालिफायर खेल्नु पर्ने हुन्छ । शीर्ष पाँचमा रहँदै एकदिवसीय मान्यता जोगाउन ९ मध्ये ५ खेल जित्नुपर्ने हुन्छ ।

नेपालको प्लेइङ–११
रोहित पौडेल (कप्तान), कुशल भुर्तेल, आसिफ शेख, ज्ञानेन्द्र मल्ल, कुशल मल्ल, दीपेन्द्रसिंह ऐरी, सन्दीप जोरा, सोमपाल कामी, करण केसी, ललितनारायण राजवंशी र सन्दीप लामिछाने ।