एजेन्सी, १० फागुन । युइएफए च्याम्पियन्स लिगको प्रि–क्वाटरफाइनलको पहिलो लेगमा रियल मड्रिडले लिभरपुलमाथि ५–२ गोलको फराकिलो जित हात पारेको छ ।

लिभरपुलको मैदान एनफिल्डमा गएराति भएको रोमाञ्चक प्रतिस्पर्धामा साविक विजेता मड्रिडले २–० गोलले पछि परेको स्थितिबाट पुनरागमन गरेको हो । मड्रिडको जितमा भिनिसियस जुनियर र कप्तान करिम बेन्जेमाले समान २ तथा र एडर मिलिसाओले एक गोल गरे । लिभरपुलका डार्बिन नुनेज र मोहम्मद सलाहले एक–एक गोल गरे ।

उत्कृष्ट सुरूवात गरेको घरेलु टोलीले १४ मिनेटभित्र २ गोलको अग्रता लिएको थियो । चौथो मिनेटमा सलाहको सहयोगमा डार्बिन नुनियाजले गोल गरेका थिए । १४औँ मिनेटमा सलाह आफैँले टिमका लागि दोस्रो गोल थपे । योसँगै उनी युरोपियन प्रतिस्पर्धामा लिभरपुलका लागि सर्वाधिक गोलकर्ता बने । उनले अहिलेसम्म ४२ गोल गरिसकेका छन् । यसअघि स्टेभन जेरार्डले ४१ गोल गरेका थिए ।

२–० ले पछि परेको मड्रिडले खेलमा फर्कन समयनै लगाएन । २१औँ मिनेटमा भिनिसियस जुनियरले लिभुरपुलसँगको दुरी घटाए । उनले कप्तान करिम बेन्जेमाको पासमा पेनाल्टी बक्सभित्रबाट दर्शनीय गोल गरे ।

३६औँ मिनेटमा भिनिसियले लिभरपुलका गोलरक्षक एलिसन बेकरको गल्तीको फाइदा उठाउँदै व्यक्तिगत र टोलीका लागि दोस्रो गोल गर्दै खेललाई पहिलो हाफमा २–२ गोलको बराबरीमा ल्याए । जोसेफ गोमेजको पासलाई एलिसनले गरेको क्लियरेन्स भिनिसियसलाई लाग्दै गोलमा परिणत भएको थियो ।

४७औँ मिनेटमा एडर मिलिसाओले गोल गरेपछि मड्रिड खेलमा पहिलो पटक अघि रह्यो । ५५ र ६७औँ मिनेटमा करिम बेन्जेमाले गोल गरेसँगै लिभपुल मड्रिडसँग ५–२ गोलले स्तब्ध भयो । बेन्जेमा लगातार १९औँ क्यालेन्डर वर्षमा च्याम्पियन लिगमा गोल गर्ने पहिलो खेलाडी बने ।

यो जितसँगै मड्रिडको क्वाटरफाइनल पुग्ने सम्भावना बलियो बनाएको छ । घरेलु मैदानमा मार्च १५ मा हुने खेलमा यही नतिजा कायम राख्न सके मड्रिड क्वाटरफाइनलमा पुग्ने छ । लिभरपुललाई अघिल्लो चरणमा पुग्न जितको आवश्यकता छ ।