मुगु १६ फागुन । जिल्लाको मुगूम कार्मारोङ गाउँपालिका वडा नम्बर ८ मा रहेको च्याप्ने गाड जलविद्युत् आयोजना एक दशक बढी  बितिसक्दा पनि हालसम्म बल्न सकेको छैन ।

२०५८ सालमा स्थापना भएको च्याप्ने गाड जलविद्युत् आयोजना सञ्चालन भएको करिब २० वर्षभन्दा बढी समय बितिसक्दा पनि हालसम्म सञ्चालनमा आउन नसक्दा बत्ति नबलेको हो ।

यो जलविधुत आयोजनाबाट २५ किलोवाट विद्युत उत्पादन गर्ने क्षमता रहेको दुई वटा माँग्री र मह गाँउमा बस्ने ३ सयभन्दा बढी घरधुरीलाई लक्षित गरी निमार्ण गरिएको थियो ।

उक्त आयोजनाबाट करोडौं रकम हिनामिना भएको र टाठा बाठाहरुले मात्र उपभोक्ता समितिमा बसी मागिखाने भाँडो बनाएको बताइएको छ ।  साबिकको जिल्ला विकास समितिको कार्यालय मुगुअन्तर्गत रहेको दुर्गम विकास क्षेत्रबाट सञ्चालित यस च्याप्नेगाढ साना जलविधुत् आयोजनाको जिम्मा पाएको राधा कन्ट्रक्सनले ५८ लाखमा ठेक्का लिएको थियो ।

राधा कन्टक्सनले कुनै काम नगरेको सामान आयोजनास्थलमा नपुराएको भ्रष्टचार गरेको भन्दै पुनः आफ्नो अध्यक्षतामा नयाँ समिति गठन गरी  काम सुरु गरे पनि अघि बढन नसकेको  कोषाध्यक्ष पाद्मा नाङगेल लामाले बताए । उनका अनुसार सो आयोजना बनाउन दाताहरुको खोजी गरिएको छ ।

२०५८ सालदेखि यस आयोजना सुरु भए पनि पछिल्ला २० वर्षामा  धेरै समिति हेरफेर भैसकेका छ तर विद्युत निमार्ण हुन सकेको छैन । विद्युत निमार्णका लागि भएको खर्च २६ लाख दुर्गम विकास कोषको, साबिकको माग्री गाविसको ५ वडादेखि ९ बडासम्म लक्षित कार्याक्रमको ८ लाख ९० हजार, नेपाल जलवायु परीवर्तन कार्यक्रम लापाको ९ लाख १० हजार, संसद विकास कोषलगायत अन्य विभिन्न निकायको सहयोग गरी ५० लाख र गमगाढ साना जलविधुत् आयोजनाको २० लाख रकम गरी जम्मा १ करोड १४ लाखभन्दा बढी रकम खर्च भइसकेको छ ।

विधुत पावर हाउसमा मात्र केही दिनका लागि मात्र बत्ति बलेको तर गाँउमा भने जनताहरु अन्धकारमा नै बस्नु परेको छ । विद्युत् नबल्दा विशेष गरेर बालबालिका पठनपाठनमा प्रभावित भएका छन् भने वृद्धवृद्धाहरुलाई पनि झन् सास्ती हुने गरेको स्थानीयको भनाइ छ ।