सुर्खेत । कर्णाली प्रदेश सरकारमा नेकपा एमालेका तर्फबाट तीन जना मन्त्री थपिएका छन्। करिब तीन सातादेखि रोकिएको मन्त्रिपरिषद् विस्तार बुधबार साँझ एमाले र नेपाली कम्युनिस्ट पार्टी (नेकपा)बीच मन्त्रालय बाँडफाँटमा सहमति भएपछि अघि बढेको हो।

प्रदेश प्रमुख यज्ञराज जोशीले नवनियुक्त मन्त्रीहरू टेकराज पछाई, जितबहादुर मल्ल र कलबहादुर हमाललाई पद तथा गोपनीयताको शपथगराएका हुन्।

मन्त्रालयको जिम्मेवारीसमेत बाँडफाँट गरिएको छ। टेकराज पछाईले आर्थिक मामिला तथा योजना मन्त्रालय, जितबहादुर मल्लले सामाजिक विकास मन्त्रालय र कलबहादुर हमालले जलस्रोत तथा ऊर्जा विकास मन्त्रालयको जिम्मेवारी पाएका छन्।

तीन सातापछि खुल्यो मन्त्रिपरिषद् विस्तारको बाटो

सत्तारूढ एमाले र नेकपाबीच मन्त्रालय बाँडफाँटमा सहमति जुट्न नसक्दा कर्णाली प्रदेश सरकारको मन्त्रिपरिषद् विस्तार लामो समयदेखि रोकिएको थियो।

बुधबार मुख्यमन्त्री मंगलबहादुर शाहीले प्रदेशसभाबाट विश्वासको मत लिनुअघि दुई दलबीच मन्त्रालयको भागबन्डामा सहमति जुटेको थियो। सहमतिअनुसार एमालेको भागमा तीन मन्त्रालय परेको थियो।

त्यसपछि एमालेले आफ्ना तीन सांसदलाई मन्त्रीका रूपमा सरकारमा पठाएको हो।

नेकपाका तीन मन्त्री नियुक्त हुन बाँकी

सत्तारूढ गठबन्धनबीच भएको सहमतिअनुसार नेकपाको भागमा पनि तीन मन्त्रालय परेका छन्। तर ती मन्त्रालयमा मन्त्री नियुक्त हुन भने बाँकी छ।

यससँगै कर्णाली प्रदेश सरकारको मन्त्रिपरिषद् विस्तारले गति लिए पनि अझै पूर्णता पाइसकेको छैन। नेकपाले आफ्ना तर्फबाट मन्त्रीको नाम टुंग्याएपछि मन्त्रिपरिषद्ले पूर्ण आकार पाउने अपेक्षा गरिएको छ।

शपथ ग्रहण समारोहमा मुख्यमन्त्री मंगलबहादुर शाही, प्रदेश सरकारका मन्त्री तथा उच्च अधिकारीहरूको उपस्थिति रहेको थियो।

Originally published on abcnews.com.np.