हेटौँडा । राष्ट्रिय प्रजातन्त्र पार्टी (राप्रपा) बाग्मती प्रदेश संसदीय दलभित्र सरकार गठनको विषयलाई लिएर विवाद चर्किएको छ। प्रमुख सचेतक कुमारी तामाङले संसदीय दलको बैठकबिनै दलका नेता उद्धव थापाले एमालेका प्रदेशसभा सदस्य किरण थापा मगरलाई मुख्यमन्त्रीमा समर्थन गर्दै प्रदेश प्रमुखसमक्ष बुझाएको पत्रमाथि कुनै कारबाही अघि नबढाउन आग्रह गरेकी छन्।

प्रदेश प्रमुखलाई पठाइएको पत्रमा तामाङले संसदीय दलको औपचारिक बैठक नबसी दलका नेताले व्यक्तिगत लेटरप्याड प्रयोग गरी मुख्यमन्त्रीमा समर्थन जनाएको पत्र बुझाएको विषय सञ्चारमाध्यमबाट थाहा पाउँदा आफूहरू आश्चर्यचकित भएको उल्लेख गरेकी छन्।

तामाङले उक्त कदम पार्टीको निर्णय र बृहत्तर हितविपरीत रहेको दाबी गर्दै संसदीय दलका नेता उद्धव थापाविरुद्ध भदौ १ गते बहुमतबाट अविश्वासको प्रस्ताव दर्ता भइसकेको समेत प्रदेश प्रमुखलाई जानकारी गराएकी छन्।

पार्टीको निर्णयविपरीत समर्थन गरिएको दाबी

तामाङका अनुसार राप्रपाको केन्द्रीय कार्यसम्पादन समितिको साउन २० गतेको बैठकले सरकार निर्माणको गणितीय चलखेलमा सहभागी नहुने निर्णय गरेको थियो।

उक्त निर्णयअनुसार प्रदेश संसदीय दललाई सरकार निर्माणसम्बन्धी छलफलमा सहभागी नहुन तथा कुनै पनि दल वा उम्मेदवारलाई समर्थन नगर्न निर्देशन दिइएको उनको भनाइ छ।

त्यसैगरी, २०८३ साउन २१ गते बसेको राप्रपा बाग्मती प्रदेश संसदीय दलको बैठकले पनि सरकार निर्माणको प्रक्रियामा सहभागी नहुने र कसैलाई समर्थन नगर्ने निर्णय गरेको तामाङले बताएकी छन्। उक्त बैठकको अध्यक्षता स्वयं संसदीय दलका नेता उद्धव थापाले गरेको पत्रमा उल्लेख छ।

प्रदेश प्रमुखसमक्ष कारबाही रोक्न आग्रह

प्रमुख सचेतक तामाङले पार्टीको केन्द्रीय निर्देशन र प्रदेश संसदीय दलको निर्णयविपरीत संसदीय दलको बैठक नै नबसी पठाइएको समर्थनपत्र अनधिकृत रहेको दाबी गरेकी छन्।

उनले प्रदेश प्रमुखसमक्ष उक्त पत्रलाई आधार बनाएर कुनै निर्णय वा कारबाही अघि नबढाउन आग्रह गरेकी छन्। साथै, आफूले प्रदेश प्रमुखलाई पठाएको पत्रसँगै साउन २१ गते बसेको संसदीय दलको बैठकको निर्णयसमेत संलग्न गरेको जनाएकी छन्।

तामाङले संसदीय दलको निर्णय, पार्टीको केन्द्रीय निर्देशन तथा संसदीय प्रक्रियाविपरीत आएको पत्रलाई मान्यता दिएर कुनै निर्णय नगर्न प्रदेश प्रमुखलाई अनुरोध गरेकी छन्।

Originally published on abcnews.com.np.