काठमाडौँ । कलाकार सीताराम कट्टेल ‘धुर्मुस’ अमेरिका फर्किएका छन्। नेपाल बसाइका क्रममा चितवनमा निर्माणाधीन गौतम बुद्ध अन्तर्राष्ट्रिय क्रिकेट रंगशालाको ऋण व्यवस्थापनका लागि आफूले दुई महिनासम्म अथक प्रयास गरे पनि समस्या समाधान हुन नसकेको उनले बताएका छन्।

सामाजिक सञ्जालमार्फत भावुक स्टाटस लेख्दै कट्टेलले राज्यका विभिन्न निकायसँग पहल गरे पनि आफूले न्याय पाउने अवस्था नबनेको उल्लेख गरेका छन्।

उनका अनुसार, रंगशालाका लागि विनियोजित १५ करोड रुपैयाँ बजेटसमेत खर्च हुन नसकी फ्रिज हुने अवस्था आएको छ। आफू भने १८ करोड ४३ लाख रुपैयाँ ऋणको भार, अधुरा सपना र पीडा बोकेर मातृभूमि छाड्न बाध्य भएको उनले बताएका छन्।

कट्टेलले नेपाल फर्कँदा रंगशालाको समस्या समाधान हुने र आफूले न्याय पाउने आशा राखेको उल्लेख गरेका छन्। तर दुई महिनासम्म राज्यका विभिन्न निकायमा धाउँदा पनि आफ्नो आवाज नसुनिएको उनको गुनासो छ।

उनले लेखेका छन्, ‘आफ्नै देशमा न्याय खोज्दा आफ्नै आवाज बेवारिसे भएको अनुभूति भएको छ।’

१० वर्षसम्म आफ्नो उर्वर समय समाज र राष्ट्रका लागि समर्पण गर्दा राज्यबाट पाएको प्रोत्साहनप्रति उनले कटाक्षसमेत गरेका छन्।

यद्यपि, सबै आशा समाप्त नभएको भन्दै कट्टेलले कुनै दिन राज्यले आफ्नो समस्या बुझ्ने र समयले सत्य बोल्ने विश्वास व्यक्त गरेका छन्।

‘मुटु भारी भएको छ, आँखा रसाएका छन्, तर हृदयको कुनै कुनामा आशा अझै बाँकी छ,’ उनले लेखेका छन्। न्यायको दिनको प्रतीक्षा गर्दै आफूहरू पुनः नेपाल फर्किने आशासमेत उनले व्यक्त गरेका छन्।

Originally published on abcnews.com.np.