काठमाडौं । गरिमा विकास बैंकले लाजिम्पाटमा रहेको आफ्नो केन्द्रीय कार्यालय काठमाडौंको बालुवाटारमा स्थानान्तरण गरेको छ। बैंकको स्वामित्वमा रहेको नयाँ भवनमा स्थापना गरिएको केन्द्रीय कार्यालयको नेपाल राष्ट्र बैंकका गभर्नर प्रा.डा. विश्वनाथ पौडेलले भदौ ३ गते बुधबार उद्घाटन गरेका हुन्।

बैंकका प्रमुख कार्यकारी अधिकृत माधवप्रसाद उपाध्यायले स्याङ्जाको वालिङबाट सुरु भएको बैंकको यात्रा पोखरा हुँदै काठमाडौंसम्म आइपुगेको उल्लेख गर्दै आफ्नै स्वामित्वको भवनमा केन्द्रीय कार्यालय सञ्चालनमा आएसँगै बैंकको यात्रामा नयाँ अध्याय सुरु भएको बताए।

उनले बैंकको व्यावसायिक सफलतामा ग्राहक, शेयरधनी, नियामक निकाय, व्यावसायिक साझेदार तथा कर्मचारीको महत्वपूर्ण योगदान रहेको बताए।

बैंकका अध्यक्ष दिलिपप्रताप खाँणले ग्राहकलाई थप सहज, प्रभावकारी र गुणस्तरीय बैंकिङ सेवा उपलब्ध गराउँदै संस्थागत सुशासन, प्रविधि, नवप्रवर्तन र दिगो विकासलाई प्राथमिकतामा राखेर अघि बढ्ने प्रतिबद्धता व्यक्त गरे।

वालिङदेखि काठमाडौंसम्म

गरिमा विकास बैंकले २०६४ कात्तिक १८ गते स्याङ्जाको वालिङबाट वित्तीय कारोबार सुरु गरेको थियो। २०६७ सालमा केन्द्रीय कार्यालय कास्कीको महेन्द्रपुलमा स्थानान्तरण गरिएको थियो।

राष्ट्रियस्तरको विकास बैंकका रूपमा स्तरोन्नति भएपछि २०७३ चैत २७ गते बैंकको केन्द्रीय कार्यालय पोखराबाट काठमाडौंको लाजिम्पाटमा सारिएको थियो। अहिले बैंकले आफ्नै स्वामित्वको भवनबाट बालुवाटारस्थित केन्द्रीय कार्यालय सञ्चालनमा ल्याएको हो।

हाल बैंकका देशभर १२६ शाखा, ५१ एटीएम तथा आधुनिक बैंकिङ सुविधाहरू रहेका छन्। बैंकले करिब १० लाख ग्राहकलाई बैंकिङ सेवा प्रदान गर्दै आएको जनाएको छ।

Originally published on abcnews.com.np.