रुपन्देही । दाङको घोराही उपमहानगरपालिका–७ बेसाहीमा ट्याक्टर र अटो आपसमा ठोक्किँदा अटो चालकको मृत्यु भएको छ भने दुई जना घाइते भएका छन्।

हिजो राति करिब ८ बजे सौडियारबाट सर्रातर्फ आउँदै गरेको रा १ त ३७०९ नम्बरको लोड ट्याक्टर र घोराहीबाट बसन्तपुरतर्फ जाँदै गरेको लु.प्र. ०२–००१ ह १९२९ नम्बरको अटो आपसमा ठोक्किएका थिए।

दुर्घटनामा घाइते भएका अटो चालक घोराही उपमहानगरपालिका–५ बसन्तपुरका ४५ वर्षीय विनोद पौडेलको उपचारका क्रममा आज बिहान २ः४५ बजे मेडिकल कलेज, कोहलपुर बाँकेमा मृत्यु भएको प्रहरीले जनाएको छ।

अटोमा सवार अन्य दुई जना घाइते भएका छन्। उनीहरूको अवस्था मध्यम रहेको र मेडिकल कलेज, कोहलपुरमै उपचार भइरहेको प्रहरीले जनाएको छ।

दुर्घटनापछि प्रहरीले ट्याक्टर र चालक घोराही उपमहानगरपालिका–१७ भैसाहीका २३ वर्षीय हिमाल चौधरीलाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।

Originally published on abcnews.com.np.