नेपालगञ्ज । लामो समयदेखि स्थगित नेपालगञ्ज–पोखरा नियमित हवाई सेवा यही भदौ ३१ गतेदेखि पुनः सञ्चालन हुने भएको छ। निजी वायुसेवा कम्पनी बुद्ध एयरले यात्रुको माग बढेपछि उडान पुनः सञ्चालन गर्न लागेको जनाएको हो।

बुद्ध एयर नेपालगञ्जका प्रमुख विनीतविक्रम शाहका अनुसार भारतको उत्तर प्रदेशलाई पोखरासँग सिधा जोड्ने यो उडानमा पछिल्लो समय यात्रुको माग बढेको छ। गत जेठ ५ गतेदेखि धार्मिक पर्यटकको संख्या घट्नु र इन्धन खर्च बढेका कारण उडान स्थगित गरिएको थियो।

सातामा तीन उडान

पुनः सञ्चालन हुने उडान आइतबार, बुधबार र शुक्रबार हुनेछ। बुद्ध एयरले उडानका लागि बुकिङसमेत खुला गरिसकेको जनाएको छ।

उडान पुनः सुरु हुने भएपछि बाँकेका पर्यटन व्यवसायी उत्साहित भएका छन्। पर्यटन प्रवर्द्धन मञ्च बाँकेका अध्यक्ष कृष्णप्रसाद श्रेष्ठले नेपालगञ्ज–पोखरा हवाई सेवाले पश्चिम नेपाल तथा भारतका पर्यटकलाई पोखरासँग सिधा जोड्ने भएकाले पर्यटन प्रवर्द्धनमा महत्वपूर्ण भूमिका खेल्ने बताए।

धार्मिक पर्यटनमा टेवा

हवाई सेवा सञ्चालन भएपछि पोखरा हुँदै बागेश्वरी मन्दिर तथा भारतको अयोध्यासहितका धार्मिकस्थलमा आवतजावत गर्न सहज हुने व्यवसायीहरूको भनाइ छ। साथै बाँके, बर्दिया, दाङ र सुर्खेतलगायत पश्चिम नेपालका नागरिकलाई पोखरा तथा मुस्ताङ पुग्नसमेत सहज हुनेछ।

स्थानीय पर्यटन व्यवसायीको लामो प्रयासपछि २०७८ साल साउन १७ गतेदेखि नेपालगञ्ज–पोखरा उडान सातामा तीन दिन सञ्चालन गरिएको थियो। पछिल्लो समय धार्मिक पर्यटकको आवागमन र यात्रुको माग बढेसँगै सेवा पुनः सञ्चालन गर्न लागिएको हो।

Originally published on abcnews.com.np.