काठमाडौं २५ फागुन । राजनीतिमा असम्भव केही नभएको भन्दै कांग्रेससँग पनि मिल्न सक्ने बताएका एमाले अध्यक्ष केपी शर्मा ओलीलाई कांग्रेस महामन्त्री गगन थापाले २०८४ सालभन्दा पहिले एमालेसंग मिल्न अससम्भव रहेको जबाफ फर्काएका छन् ।

राष्ट्रपति निर्वाचनस्थलमा सञ्चारकर्मीलाई प्रतिक्रिया दिँदै गगनले २०८४ सालयता एमालेसँग मिल्न सक्ने अवस्था नै नभएको बताएका हुन् ।

‘२०८४ सालमा एमालेसँग मिल्न सकिएला, तर अहिले यो सम्भव छैन,’ थापाले भने, ‘हामीले जिताउने राष्ट्रपतिले जनतालाई दुःख दिनु हुँदैन । जनताले सम्मान गर्ने राष्ट्रप्रमुख हामी बनाउँदैछौं ।’

नयाँ गठबन्धनका प्रधानमन्त्रीलाई पनि सफल बनाएरै छोड्ने थापाले बताए ।

थापाअघि एमाले अध्यक्ष ओलीले राष्ट्रपति चुनावपछि कांग्रेस र एमाले मिलेर अगाडि बढ्न सक्ने बताएका थिए ।

तर, थापाले यो संसदको कार्यकाल रहने २०८४ सम्म त्यस्तो सम्भावना नहुने जिकिर गरेका हुन् ।