काठमाडौँ, २ चैत । रियल मड्रिड युइएफए च्याम्पियन्स लिगको क्वाटरफाइनलमा प्रवेश गरेको छ । इंग्लिस क्लब लिभुरपुललाई हराउँदै स्पेनिस क्लब मड्रिडले अन्तिम आठमा स्थान पक्का गरेको हो ।

गएराति भएको दोस्रो लेमा लिभरपुलमाथि १–० को जित निकालेको रियलले समग्रमा ६–२ को फराकिलो जित हात पारेको हो । पछिलो लेगमा मड्रिडले ५–२ को सानदार जित निकालेको थियो ।

सान्टियागो बर्नबेउमा बुधबार राति भएको प्रतिस्पर्धात्मक र रोमाञ्चक खेलमा मड्रिडको जितमा दोस्रो हाफमा कप्तान करिम बेन्जेमाले गरेको गोल नै निर्णायक बन्यो । उनले ७८औँ मिनेटमा ब्राजिलियन विंगर फर्वाड भिनिसियस जुनियरको पासमा गोल गर्न सफल भए ।

लिभरपुलले पनि घरेलु टोलीविरूद्ध गोलको अवसर सिर्जना गरे पनि फिनिसिङको नमुना देखाउन सकेन । सातौँ मिनेटमा मोहम्मद सलाहको पासमा डार्विन नुनेजको प्रहारलाई मड्रिडका गोलरक्षक थिबाउट बोर्टुवाले विफल पारे ।

१४औँ मिनेटमा भिनिसियसको प्रहारलाई लिभरपुलका गोलरक्षक एलिसन बेकरले विफल पारे । २०औँ मिनेटमा एडुआर्डो कामाभिंगाको झन्डै २५ यार्ड टाढाको प्रहार क्रसबारमा लागेर बाहिरिँदा मड्रिड अग्रता लिनबाट चुक्यो ।

गएराति नै भएको अर्को खेलमा आइनट्राख्ट फ्रान्कफुटलाई हराउँदै नेपोली क्वाटरफाइनलमा पुगेको छ । योसँगै च्याम्पियन्स लिगको क्वाटरफाइनलको समीकरण पूरा भएको छ । बेन्फिका, चेल्सी, बार्यन म्युनिख, एसी मिलान, म्यानचेस्टर सिटी, रियल मड्रिड, इन्टर मिलान र नेपोली क्वाटरफाइनलमा पुगेका छन् ।

क्वाटरफाइनल ‘ड्र’ युइएफए मुख्यालय स्वीट्जरल्यान्डको नियोनमा शुक्रबार हुँदै छ ।