काठमाडौँ १६ चैत। नेपाली बैङ्किङ इन्ड्रस्टिमा भइरहेको चौतर्फी आक्रमणमा नेपाल बैंकर्स संघ (एनबीए) ले आपत्ति जनाएको छ । नियमसंगत तरिकाले पारदर्शी भएर काम गर्दा गर्दै पनि बैंकमाथि प्रहार हुनु दुःखद भएको सङ्घका अध्यक्ष सुनिल केसीले बताए ।

एनएमबी बैंकका कार्यकारी अधिकृत (सिइओ) समेत रहेका अध्यक्ष केसीले भने, ‘बैङ्किङ इन्ड्रस्टिमाथिको आक्रमण केबल संस्थामाथिको मात्र होइन, यो त समग्र मुलुकको वित्त क्षेत्रमाथिकै आक्रमण हो’ केसीले चेतावनी पूर्ण सन्देश दिँदै भने, ‘नेपालको बैङ्किङ क्षेत्रमा के भइरहेको छ अन्तर्राष्ट्रिय क्षेत्र हेरिरहेको छ । यहाँको बैङ्किङ क्षेत्रमा एकपछि अर्को यस्तै प्रहार भइरहने हो भने विदेशी लगानी (एफडीआई) नआउन पनि सक्छ’ केसीले भने ।

बैङ्किङ विश्वासकै कारण विदेशी लगानी सहज भइरहेको बताउँदै अध्यक्ष केसीले त्यो विश्वास गुमे अहिले आइरहेको धेरथोर लगानी समेत रोकिन सक्ने बताए । यसै अवसरमा बैंकर्स संघले अहिलेको अवस्था निक्षेपकै ब्याजदर साढे ८ प्रतिशत हाराहारी पुगिसकेको अवस्था कर्जामा १३.०३ प्रतिशत स्वाभाविक भएको बताएको छ ।

तरलता सहजताको रूपमा अहिले पनि बैंकहरुसँग ७० अर्ब माथि लगानी योग्य रकम रहेकाले सहज अवस्थामा नै रहेको बताए । तर, आर्थिक समस्याका बीच केही समय बैंकहरुले लगानी रोकेको र अहिले राम्रो क्षेत्र हेरेर लगानी गर्न थालेको बताए । लगानीको दीर्घ फाइदालाई हेरेर बैंकहरु मिलेर विद्युतीय गाडीमा समेत लगानी बढाइरहेको अध्यक्ष केसीले बताए । जसले पेट्रोलियम पदार्थमा बर्सेनि बाहिरिन सक्ने अर्बौँ पैसा स्वदेशमा नै रोक्न सकिने अपेक्षा रहेको उनको भनाइ छ ।