काठमाडौँ, १८ चैत । इन्डियन आयल कर्पोरेसनले पेट्रोलियम पदार्थको मूल्य घटाएर पठाएको छ । प्रत्येक महिनाको १ र १५ तारिखमा आउने मूल्य सूचीअनुसार पेट्रोलियम पदार्थको मूल्य घटेर आएको नेपाल आयल निगमले जानकारी दिएको छ ।

निगमका अनुसार नयाँ मूल्यसूचीमा डिजेलको मूल्य प्रतिलिटर ६.८२ रूपैयाँ घटेर आएको छ । यस्तै, पेट्रोलको मूल्य प्रतिलिटर १.७४ रूपैयाँ घटेर आएको छ । यससँगै, डिजेलको खरिद लागत १५२.१७ रूपैयाँ र पेट्रोलको खरिद लागत प्रतिलिटर १६८.१२ रूपैयाँ कायम भएको छ ।

हाल बजारमा डिजेलको बिक्री मूल्य प्रतिलिटर १७५ रूपैयाँ र पेट्रोलको बिक्री मूल्य प्रतिलिटर १७८ रूपैयाँ कायम छ । भारतबाट आएको नयाँ मूल्यसूचीअनुसार नेपाली बजारमा डिजेलमा निगमलाई २२.८३ रूपैयाँ र पेट्रोलमा ९.८८ रुपैयाँ फाइदा रहेको निगमका प्रबन्ध निर्देशक उमेश थानीले जानकारी दिए ।

साथै, खाना पकाउने एलपी ग्यासको मूल्यसमेत घटेर आएको छ । नयाँ मूल्यसूचीअनुसार एलपी ग्यासको मूल्य प्रतिसिलिन्डर ९६ रूपैयाँ घटेर आएसँगै घाटा ५०० रूपैयाँमा आइपुगेको छ ।