काठमाडौँ, २३ चैत । रियल मड्रिड चिरप्रतिद्वन्द्वी बार्सिलोनालाई स्तब्ध पार्दै कोपा डेल रेको फाइनलमा प्रवेश गरेको छ ।

मड्रिडले सेमिफाइनलको दोस्रो लेगमा उत्कृष्ट पुनरागमन गर्दै ४–० गोलको जित हात पार्‍यो । बार्सालाई उसकै मैदानमा पराजित गर्दा करिम बेन्जेमाले ह्याट्रिक गरे ।

क्याम्प नोउमा भएको पहिलो लेगमा बार्साले १–० गोलको अग्रता लिएको थियो । तर, घरेलु मैदानमा भने जाभी हर्नान्डेजको टोलीले लय गुमायो ।

पहिलो हाफको इन्जुरी समयमा मड्रिडका भिनिसियस जुनियरले गोल गर्दै १–० को अग्रता दिलाए । उनले कप्तान करिम बेन्जेमाको पासलाई गोल गर्न सफल भए । उनको जारी सिजनमा यो २०औँ गोल हो ।

त्यसपछि तीनै गोल बेन्जेमाको नाममा रह्यो । ५०औँ मिनेटमा बेन्जेमाले व्यक्तिगत पहिलो र टोलीका लागि दोस्रो गोल गर्दै मड्रिडको अग्रता दोब्बर पारे । उनले लुका मोड्रिचको पासमा गोल गर्न सफल भएका थिए । ५८औँ मिनेटमा बेन्जेमाले पेनाल्टीमा गोल गर्दै मड्रिडलाई सहज जिततर्फ अघि बढाए ।

८०औँ मिनेटमा भिनिसियसले मिलाइदिएको बलमा बेन्जेमाले गोल गर्दै ह्याट्रिक पूरा गरेपछि कार्लोस एन्सेलोटीको टोली सानदार जितका साथ उपाधि नजिक पुग्यो । बेन्जेमाको मड्रिडका लागि यो लगातार दोस्रो ह्याट्रिक हो । उनले गत आइतबार ला लिगाको खेलमा रियल भल्लाडोलिडलाई ६–० गोलले पराजित गर्दा ह्याट्रिक गरेका थिए ।

यस जितसँगै मड्रिडले दुई साताअघि ला लिगामा भोगेको हारको बदला लिन सफल भएको छ । अब उपाधिका लागि मड्रिडले ओसासुनासँग प्रतिस्पर्धा गर्ने छ ।