काठमाडौं २६ चैत । प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्डले पूर्व माओवादी नेता तथा हालका एमाले सचिव लेखराज भट्टलाई उनको घरमै पुगेर भेटेका छन् ।

कञ्चनपुरको एक कार्यक्रममा सहभागी हुन जाने क्रममा धनगढी विमानस्थलमा ओर्लिएका प्रचण्ड भट्ट निवास अत्तरिया पुगेका हुन् ।

प्रधानमन्त्री प्रचण्ड विमानस्थलबाट सीधै कैलालीको गोदाबरी नगरपालिका–१ अत्तरियास्थित भट्टको निवासमा पुगेका हुन् । प्रचण्डले भट्टसंगै नास्ता गरेर सदुरपश्चिमाञ्चल विश्वविद्यालयको दिक्षान्त समारोहमा सहभागी हुन गएका छन् ।

प्रधानमन्त्री प्रचण्डले भट्टको घरसँग ४० वर्षदेखिको सम्बन्ध रहेको बताए । उनले भने, ‘यो घरसँग मेरो ४० वर्षदेखि सम्बन्ध छ । यहाँमाथि एउटा म बस्ने कोठा छ,जहाँ मैले खाने बस्ने गर्थेँ । त्यसैले यो घर मेरो पनि हो भन्ने लागेर यहाँ आएको हो ।’

‘लेखराजजी राजनीतिक व्यक्तित्व भएकोले समसामयिक राजनीतिक घटनाक्रमबारे छलफल हुने नै भै हाल्यो’ प्रधानमन्त्रीले भने ।

जनयुद्धमा भट्ट प्रचण्डसँग अत्यन्तै निकट नेताका रुपमा चिनिन्थे । नेकपा विभाजनपछि एमाले प्रवेश गरेका भट्टसँग प्रचण्ड निक्कै चिढिएका थिए ।  भट्ट एमाले प्रवेश गरेपछि पहिलोपटक दुई नेताबीच औपचारिक भेटघाट भएको हो । प्रचण्ड भट्टकै निवासमा पुगेर भेटेको विषयलाई अर्थपूर्ण रुपमा लिइएको छ ।

अदालती आदेशबाट तत्कालीन नेकपा विभाजन भएपनि पूर्वमाओवादी नेता भट्ट एमालेतिर लागेका थिए । नेकपा बन्नु अघि प्रचण्डंगको भट्टको विशेष सम्वन्ध थियो । तर सरकारमा पहिलो पटक नै मन्त्री नबनाएपछि उनी असन्तुष्ट बन्दै आएका थिए ।
एमाले सचिव बनेपनि माओवादीमा जस्तो सम्मान नभएकोमा पूर्व माओवादी नेताहरु असन्तुष्ट हुनुका साथै सर्वजनिक जिवनमा पनि गुमनाम जस्तै छन् ।
भेटका क्रममा प्रचण्डले एमालेतिर लाग्ने पुरानो निर्णयमा पुर्नविचार गर्न भनेका थिए । भट्टले स्पष्ट जबाफ नदिएपनि उनी सहितका टोपबहादुर रायमाझी र मणि थापाहरु माओवादीमै र्फिर्कन सक्ने गरी छलफल चलाएको बताइएको छ ।