काठमाडौं २७ चैत । प्रतिनिधिसभा कार्यव्यवस्था परामर्श समितिको पहिलो बैठकले संसदीय समिति चाँडो गठन गर्ने निर्णय गरेको छ । प्रतिनिधिसभाको अघिल्लो बैठकले परामर्श समिति गठन गरेको थियो ।

समितिको पहिलो बैठकले भोलि बेलुकासम्म समितिका लागि दलहरूले नाम पठाउने सहमति गरेको नेकपा ९एमाले० सचेतक महेश बर्तौलाले बाह्रखरीलाई जानकारी दिए ।

बैठकले संघीय संसद्को संयुक्त बैठक र संयुक्त समिति कार्यसञ्चालन नियमावली संशोधन गर्ने पनि निर्णय गरेको छ । जसका लागि आवश्यक समिति गठन गर्ने बैठकले निर्णय गरेको उनले जानकारी दिए ।

“पहिलो बैठकबाट हामीले महत्वपूर्ण दुई निर्णय गरेका छौं,” बर्तौलाले बाह्रखरीसँग भने, “भोलि साझसम्म १० वटा विषयगत समिति गठन गर्न दलहरूबाट सांसदहरूको नाम संकलन गर्ने र संघीय संसद्को संयुक्त समिति गठन गर्न र सञ्चालनका लागि नियमावली संशोधन समिति बनाउने निर्णय गरेका छौं ।”

प्रतिनिधिसभाअन्तर्गत १० वटा विषयगत समिति छन् । उक्त समितिलाई २०७९ सालभित्रै गठन र पूर्णता दिने तयारी कार्यव्यवस्था परामर्श समितिमा भएको हो ।

यस्तै, संयुक्त समितिअन्तर्गत दुई संसदीय सुनुवाइ तथा राज्यको निर्देशन र सिद्धान्तसँग सम्बन्धित समिति छन् । यी समितिहरू चैत अन्त्यसम्म गठन भइसक्ने बर्तौलाले जानकारी दिए ।