काठमाडौं २७ चैत । नेपाली कांग्रेसका महामन्त्री गगन थापाले सिंहदरबारलगायत ठाउँको फोहोर नउठेकोबारे प्रधानमन्त्रीले काठमाडौं महानगरपालिकाका मेयरसँग तत्काल संवाद गर्नुपर्ने माग गरेका छन्।
सोमबार प्रतिनिधि सभाको बैठकमा बोल्दै थापाले केन्द्र, प्रदेश र स्थानीय सरकारबीच समन्वयको अभाव देखिएको बताएका हुन्।
‘बाघ दरबार र सिंहदरबारबीच टकराव देखिएको छ। जनप्रतिनिधिले आफ्नो कुरा सुनुवाइ नभएको भनेर माग पूरा गराउन प्रयोग गरेको शैली र भाषाबारे पछि बहस गर्दै गरौंला,’ थापाले भने,‘तर अहिलेको समस्या समाधान गर्न तत्काल काठमाडौं महानगरपालिकासँग संवाद गरियोस्। जुन विषय अहिले सल्टाउनु पर्ने हो सल्टाइयोस्, जुन विषयमा समझदारी कायम गर्नुपर्ने हो समझदारी कायम गरियोस्, जायज मागहरू पूरा गरियोस्। हामी काठमाडौंका जनप्रतिनिधिलाई पनि यो प्रक्रियामा सहभागी गराइयोस्।’

सांसद थापाले समन्वयको अभावको विषय काठमाडौं महानगरसँग मात्र सम्बन्धित नभएको बताए।
‘अहिले सिंहदरबारमा थुप्रै पालिकाका प्रमुख कर्मचारीको सरूवा गर्न र रोक्न सिंहदरबारमा धाइरहेका देखिन्छन्,’ उनले भने,‘तीन तहको सरकारबीच अन्तर समन्वय गर्न संघीय सरकार प्रोएक्टिभ हुनुपर्छ। तर त्यो भएको छैन।’
आफूला सहयोग नगरेको भन्दै काठमाडौंका मेयर बालेन शाहले आइतबारदेखि सिंहदरबार, पुल्चोकको मन्त्रीक्वार्टर, राष्ट्रपति कार्यालय शितल निवासको फोहोर नउठाउन निर्देशन दिएका छन्।
मेयरको निर्देशनपछि सोमबार पनि ती ठाउँको फोहोर उठेको छैन।