सुर्खेत, १६ माघ । सिम्ता गाउँपालिकाको हिउँदे सभा मंगलबारदेखि सुरु भएको छ । गाउँपालिकाको कार्यालय सिम्तामा सुरु भएको सभाले विभिन्न कार्यविधि तथा नियमावलीहरु पारित गर्ने सभाका सदस्य नेत्रलाल महत्तराले जानकारी दिए ।

गाउँपालिकाका अध्यक्ष कविन्द्रकुमार केसीले सभाको सञ्चालन गर्दै विभिन्न ऐन, नियमावली र कार्यविधि सभामा प्रस्तुत गरेका थिए ।

४७ सदस्यीय सभाले विभिन्न कार्यविधिहरु पारित गरेको छ । पारित भएका ऐन, नियमहरुमा आर्थिक कार्यविधि नियमित तथा व्यवस्थित गर्न बनेको ऐन, २०७४, गाउँसभा व्यवस्थापन तथा सञ्चालन नियमावली, २०७४ र बजार अनुगमन निर्देशिका, २०७४ रहेका छन् ।

यसैगरी सभाले स्थानीय रेडियो सञ्चालन कार्यविधि, २०७४ र कार्यपालिका बैठक सञ्चालन तथा व्यवस्थापन कार्यविधि, २०७४ पनि पारित गरेको छ । सभा बुधबार पनि सञ्चालन हुने गाउँपालिकाका अध्यक्ष कविन्द्र केसीले बताए ।