बैतडी, २९ चैत । बैतडीमा जिप दुर्घटना हुँदा ६ जनाको मृत्यु भएको छ । जयपृथ्वी राजमार्गअन्तर्गत पाटन नगरपालिका–८ झौलेक मोडमा मंगलबार राति करिब ११ः२५ बजे जिप दुर्घटना भएको हो ।

दुर्घटनामा ६ जनाको घटनास्थलमै मृत्यु भएको जिल्ला प्रहरी कार्यालय बैतडीका प्रहरी निरीक्षक योगेश खत्रीले जानकारी दिए ।

बझाङको केदारस्युँ गाउँपालिका–५ बाँझका ६० वर्षीय मने बोहरा, ३० वर्षीय नरे बोहरा, ३५ वर्षीय गोरख बोहरा, ४५ वर्षीय मानबहादुर धामी, ४५ वर्षीय बिर्ख धामी र ४५ वर्षीय वीरे धामीको मृत्यु भएको उनले बताए । उनीहरू सबै एकै गाउँका रहेको प्रहरी निरीक्षक खत्रीले बताए ।

जिपमा सवार ५ जना सकुशल छन् । जिप खस्ने क्रममा सडकमै हालफालेका पाँचैजना सकुशल रहेको प्रहरीले जनाएको छ । चालक सम्पर्कविहीन छन् ।

झुलाघाटबाट बझाङको बाग्थालातर्फ जाँदै गरेको से१ज ७६४ नम्बरको जिप अनियन्त्रित भइ दुर्घटना भएको प्रहरीले जनाएको छ । जिप सडकबाट करिब ५०० मिटर तल खसेको प्रहरीले जनाएको छ ।