काठमाडौँ, ३ वैशाख । गढीमाई नगरपालिका–८ धोबिनियामा शनिबार एक जनाको ज्यान जानेगरी भएको गोली प्रहार घटनामा संलग्न भएको आरोपमा प्रहरीले १६ जनालाई नियन्त्रणमा लिएको छ ।

धोबिनियामा शनिबार बाटो विस्तार गर्ने क्रममा भएको विवादमा गोली चल्दा स्थानीय ५० वर्षीय रामकुमार राय यादवको मृत्यु भएको थियो । गोली लागेर गम्भीर घाइते यादवको वीरगञ्ज मेडिकल कलेजमा उपचारका क्रममा मृत्यु भएको हो । उनको शव अहिले पनि अस्पतालमै राखिएको छ । आफन्तले शव बुझेका छैनन् ।

घटनामा संलग्न भएको आशंकामा गएराति सम्ममा गाउँका १६ जनालाई पक्राउ गरिएको जिल्ला प्रहरी कार्यालय रौतहटका प्रवक्ता प्रहरी नायब उपरीक्षक (डिएसपी) उमाशंकर यादवले जानकारी दिए ।

दुई पक्षबीच भएको झडपको क्रममा ४ जना घाइते भएका छन् । डिएसपी यादवका अनुसार घाइतेमध्ये दुई जनालाई गोलीको छर्रा लागेको छ भने दुई जनाको टाउको फुटेको छ । निरन्जन राय यादव र प्रताप यादवलाई गोली लागेको छ । यस्तै, कपिलदेव राय यादव र अर्का एकजनाको टाउको फुटेको छ ।

• रौतहट गोली काण्ड : एकको मृत्यु, बन्दुकसहित ९ जना नियन्त्रणमा

गोली लागेकामध्ये निरन्जनको अवस्था गम्भीर रहेको डिएसपी यादवले जानकारी दिए । घाइते चारैजनाको रौतहटकै गरूढास्थित ग्रान्डी अस्पतालमा उपचार भइरहेको छ ।

एकजनाको मृत्य र ४ जना घाइते हुनेगरी भएको गोली काण्डपछि धोबिनियामा प्रहरीले सुरक्षा सतर्कता बढाएको छ ।

बाटो विस्तार गर्ने क्रममा सडक वारिपारिका रामईश्वर राय र राजकुमार यादव पक्षबीच विवाद हुँदै आएको थियो । दुवै पक्षले आफ्नो जग्गा बाटोमा पर्न नहुने भन्दै विगत केही दिनदेखि विवाद गर्दै आएका थिए ।

दुई पक्षबीच विवाद बढेपछि शनिबार दिउँसो १ बजे इलाका प्रहरी गरूडाका प्रहरी निरीक्षक वीरेन्द्र पासवान नेतृत्वको टोली घटनास्थल पुगेर दुवै पक्षलाई सम्झाइबुझाई गरेर फर्किएको थियो ।

प्रहरी फर्किएको २ घन्टापछि (दिउँसो करिब ३ बजे) नै गोली प्रहारसहितको घटना भएको प्रहरीले जनाएको छ ।

झडपका क्रममा १२ बोरको बन्दुकबाट गोली प्रहार भएको प्रहरीको भनाइ छ । घटनाको विस्तृत अनुसन्धान भइरहेको डिएसपी यादवले बताए ।