काठमाडौँ, ८ वैशाख । एसिसी मेन्स प्रिमियर कपमा घरेलु टोली नेपाल र ओमानबीच प्रतिस्पर्धा हुँदै छ । यो खेल बिहान ९ बजेदेखि त्रिवि क्रिकेट मैदान कीर्तिपुरमा सुरू हुने छ । जितका साथ आफ्नो ५०औँ एकदिवसीय खेल विशेष बनाउने नेपालको लक्ष्य छ ।

नेपाल लगातार दोस्रो जित हात पार्ने लक्ष्यमा छ । समूहको आफ्नो पहिलो खेलमा नेपालले मलेसियालाई ६ विकेटले पराजित गरेको थियो । ओमानले पनि कतारलाई ४० रनले पराजित गर्‍यो । दुवै टिम एकदिवसीय मान्यता प्राप्त राष्ट्र हुन् । विश्व क्रिकेट लिगमा ओमानले दोस्रो र नेपालले तेस्रो हुँदै एकदिवसीय विश्वकप ग्लोबल छनोटमा स्थान बनाएका थिए ।

नेपाल र ओमानबीच ६ पटक प्रतिस्पर्धा भएको छ । जसमा नेपालले ४ खेलमा हार बेहोर्दा दुईमा जित निकालेको थियो । पछिल्लो पटक लिग–२ अन्तर्गत अमेरिकामा भएको खेलमा भने नेपाल ७ विकेटले विजयी भएको थियो । ओमान तीन वर्षपछि नेपाल आएको हो ।

सन् २०२० मा नेपाल, अमेरिका र ओमानबीचको त्रिकोणात्मक सिरिजबाट लिग–२ को सुरूवात भएको हो । घरेलु मैदानमा नेपाल ९ खेलदेखि अपराजित छ ।

जारी प्रतियोगिताअघि भएको अभ्यास खेलमा पनि नेपालले ओमानलाई ५ विकेटले हराएको थियो । नेपाल २ अंकका साथ तालिकाको शीर्ष स्थानमा छ । सामान अंक जोडेको ओमान दोस्रो स्थानमा छ ।

२०१८ मा एकविदसीय मान्यता पाएको नेपालले ओमानविरूद्ध आजको प्रतिस्पधापछि ५० एकदिवसीय खेल पूरा गर्नेछ । यो खेलमा विजयी हुँदै ५०औँ एकदिवसीय विशेष बनाउने नेपालको लक्ष्य छ ।