काठमाडौं १० बैशाख । प्रधानमन्त्री पुष्पकमल दाहाल प्रचण्डले नेपालमा बनेका सवारीसाधन दर्ता प्रक्रियाका लागि विद्यमान कानुनी समस्या हल गर्न तत्काल ऐन निर्माणको प्रस्ताव र प्रोत्साहनको नीति ल्याउन निर्देशन दिएका छन्।

आइतबार बिहान नेपाल सरकारका मुख्यसचिव शंकरदास बैरागीलाई नेपालमा बनेको सवारीसाधन दर्ता नभएको जनगुनासो सम्बोधन हुने गरी नेपालमा उत्पादन हुने सवारीसाधन दर्ताको कानुनी व्यवस्था गर्न निर्देशन दिएका छन्।

सरकारले नवप्रवर्तनलाई विकास तथा समृद्धिको मुख्य उत्प्रेरक शक्तिको रूपमा लिएको भन्दै प्रधानमन्त्री प्रचण्डले आविष्कार र नवप्रवर्तनका क्षेत्रमा नेपाली उत्पादनलाई प्रोत्साहन गर्ने नीति अख्तियार गर्नसमेत निर्देशन दिए।

प्रधानमन्त्रीले ‘यात्री’लगायतका नेपालमै उत्पादित सवारीसाधनले दर्ता भई काम गर्न नपाएको भनी सञ्चारमाध्यममा आएका गुनासोप्रति आफू गम्भीर रहेको बताए । साथै उनले विद्यमान कानुनी व्यवस्था अपुग भएकाले तत्काल ऐन परिमार्जन या नयाँ मस्यौदा तयार गर्न मन्त्रिपरिषदमा प्रस्ताव पेस गर्न निर्देशन दिए।

प्रधानमन्त्रीको निर्देशनलगत्तै मुख्यसचिवले उद्योग वाणिज्य तथा आपूर्ति मन्त्रालयका सचिव मधु मरासिनीलाई तत्कालै नेपालमा उत्पादित सवारीसाधनको दर्ता एवं प्रवर्द्धनसम्बन्धी कानुन निर्माणको प्रस्ताव पेस गर्न निर्देशन दिए।

यसअघि प्रधानमन्त्री प्रचण्डले आफ्नो कार्यकालको कार्यभार ग्रहण गरेलगत्तै मातहतका मन्त्रालयलाई नवप्रवर्तन तथा नवीतनम प्रविधिको प्रयोगमार्फत सुशासन तथा जनसरोकारका विषय सम्बोधन गर्दै आत्मनिर्भर अर्थतन्त्र निर्माणको कार्ययोजना प्रस्तुत गर्न निर्देशन दिए।