काठमाडौँ, १४ वैशाख । प्रदेश प्रमुखले सरकार गठनका लागि दिएको अन्तिम दिन आज गण्डकीमा नयाँ सरकार गठन हुँदै छ ।

नेकपा (एमाले) नेतृत्वको सरकार ढलेपछि प्रदेश प्रमुख पृथ्वीमान गुरूङले वैशाख १२ गते आज अपरान्ह ४ बजेभित्र नयाँ सरकार गठन गर्न आह्वान गरेका थिए । योसँगै गण्डकीमा कांग्रेस नेतृत्वमा सरकार गठन हुने भएको छ । कांग्रेसका सुरेन्द्रराज पाण्डे मुख्यमन्त्री नियुक्त हुँदै छन् ।

केन्द्रमा बनेको नयाँ समीकरणसँगै प्रदेश सरकारमा पनि असर परेको छ । एमालेका खगराज अधिकारी नेतृत्वको सरकारलाई दिएको समर्थन नेकपा (माओवादी केन्द्र)ले फिर्ता लिएपछि उनी अल्पमतमा परेका थिए । उनले वैशाख ९ गते विश्वासको मत पाउन भनेर प्रदेशसभामा पेस गरेको प्रस्ताव बहुमतले अस्वीकृत भएको थियो ।

अब बन्ने सरकारको नेतृत्व कांग्रेस र माओवादीले आलोपालो गर्ने सहमति भएको नेताहरूको भनाइ छ । पहिलो चरणमा कांग्रेसका पाण्डे मुख्यमन्त्री बन्ने निश्चित भएको हो । तर, मन्त्रालय भागबन्डामा भने दुई दलबीच सहमति जुट्न सकेको छैन । माओवादीले सातमध्ये तीन मन्त्रालय पाउनुपर्ने अडान लिएको छ । यसका लागि उसले केन्द्रको निर्णय कुरिरहेको छ ।

मन्त्रीको नाम टुंगो लागे मुख्यमन्त्रीसँगै केही मन्त्रीले शपथ लिने बताइएको छ ।

गण्डकी प्रदेशमा कांग्रेसका २७, माओवादीको (सभामुखसहित) ८ प्रदेशसभा सदस्य छन् । यहाँ बहुमतको सरकार बनाउन दुई दल मात्रै मिले पनि पर्याप्त हुन्छ ।

६० सदस्यीय प्रदेशसभामा सरकार बनाउन ३१ सदस्य आवश्यक पर्छ । कांग्रेस–माओवादी गठबन्धनमा नेकपा (एकीकृत समाजवादी)का राजीव गुरूङ (दीपक मनाङे) पनि सहभागी छन् । मनाङबाट स्वतन्त्र उम्मेदवारको रूपमा सर्वसम्मत चुनिएपछि मनाङे एकीकृत समाजवादीमा प्रवेश गरेका हुन् ।