काठमाडौँ १६ बैशाख । अर्जेन्टिनाले चीनबाट आयात गर्ने हरेक वस्तुको खरिद चिनियाँ मुद्रामै गर्ने घोषणा गरेको छ । बीबीसी हिन्दीका अनुसार डलरको सञ्चिति घटेसँगै अर्जेन्टिनाले चीनबाट आयात गरिने हरेक वस्तु चिनियाँ मुद्रा युआनमा खरिद गर्ने भएको हो ।

अर्जेन्टिनाद्वारा जारी सरकारी वक्तव्यमा चीनबाट अप्रिल महिनामा मात्रै करिब १ अर्ब अमेरिकी डलर बराबरको वस्तु युआनमा खरिद गर्ने लक्ष्य रहेको एजेन्सीलाई उद्धृत गर्दै रोयटर्सले लेखेको छ । यसपछि करिब ७९ करोड डलर बराबरको आयात चीनबाट युआन मुद्रामा गरिने भएको छ । अर्जेन्टिनाका लागि चिनियाँ राजदूत जु सिया‌ओलीसँग बैठक बसेपछि अर्जेन्टिनाका अर्थमन्त्री सर्जियो मस्साले यो निर्णय लिनुको कारण डलरको सञ्चितिमा कमी आउनु भएको बताएका छन् ।

अहिले अर्जेन्टिनामा खडेरीका कारण कृषि उत्पादन दिन प्रतिदिन घट्दै गएकाले त्यहाँ कृषि निर्यात पर्याप्त मात्रामा हुन सकेको छैन, जसका कारण डलर सञ्चितिमा कमी आएको छ । यसअघि सन् २०२२ नोभेम्बरमा अर्जेन्टिनाले आफ्नो अन्तर्राष्ट्रिय भण्डार बलियो बनाउने उद्देश्यले चीनसँग ५ अर्ब डलरको मुद्रा सटही गरेको थियो ।