काठमाडौँ, २१ वैशाख । बेलायतका राजा चार्ल्स तृतीयको राज्याभिषेकमा नेपालको तर्फबाट सहभागिता जनाउन परराष्ट्रमन्त्री एनपी साउद आज बेलायत जाँदै छन् ।
बिहान ११ बजेको उडानमार्फत् उनी बेलायत जान लागेका हुन् । राज्याभिषेकमा सहभागी भई २६ वैशाखमा साउद काठमाडौँ फर्किने स्वकीय सचिव दीपककुमार जोशीले जानकारी दिए ।
चार्ल्स तृतीयको राज्याभिषेकमा सहभागी हुन नेपालबाट राष्ट्रपति रामचन्द्र पौडेल जाने कार्यक्रम थियो । तर, पौडेलको स्वास्थ्यमा समस्या देखिएपछि लामो समय भारतमा उनको उपचार गरिएको थियो । हालै काठमाडौँ फर्किएका पौडेलको स्वास्थ्य प्रतिकूलताका कारण साउदले सहभागिता जनाउन लागेका हुन् ।
वैशाख २३ गते (मे ६ तारिख) मा बेलायती राजा चार्ल्स तृतीयको बकिङ्घम दरबारमा राज्याभिषेक कार्यक्रममा तय भएको छ ।
राज्याभिषेक समारोहमा सहभागी हुन २ हजार पाहुनालाई निमन्त्रणा पठाएको बताइएको छ ।
गत सेप्टेम्बरमा महारानी एलिजावेथ द्वितीयको निधनपछि उनका उत्तराधिकारी तथा बेलायती राजा चार्ल्स तृतीयको राज्याभिषेक समारोह तीन दिनसम्म मनाइँदै छ ।
प्रतिक्रिया दिनुहोस्