काठमाडौं २२ बैशाख । नेपाली कांग्रेसले नक्कली भुटानी शरणार्थी प्रकरणलाई जघन्य अपराध भनेको छ। उसले प्रकरणमा जोडिएका सबैलाई कराबाहीका दायरामा ल्याउनु पर्ने प्रष्ट पारेको छ।

सभापति शेरबहादुर देउवाको निवास धुम्बाराहीमा बसेको पदाधिकारी बैठक पछि प्रवक्ता डा. प्रकाशशरण महतले नक्कली भुटानी शरणार्थी प्रकरणमा संलग्न सबै सजायको दायरमा आउनु पर्ने बताए।

‘नक्कली भुटानी शरणार्थी अवश्य पनि जघन्य अपराध हो। यस्तो सोच्नै नहुने कुरा भयो भन्ने आइरहेको छ। पत्रपत्रिकामा बाहिरएपछि हामीले जानकारी पाएको हो,’ उनले भने, ‘क्रियाकलपा अमानवीय आपराधिक काम हो। जति निन्दा गरे पनि कम हुन्छ। को(को संलग्न, कसरी संलग्न भएको छ, अनुसन्धानकर्ता अथोरिटीले बाहिर ल्याउला। अनुसन्धान र न्याय निरुपण पनि होला। जो(जो सहभागी छन्, गलत आपराधिक क्रियाकलाप गर्नेहरु सजायको दायरमा आउनु पर्छ। आउँछन्।’
पार्टी सभापति शेरबहादुर देउवानिवास धुम्बाराहीमा शुक्रबार अपरान्ह बसेको बैठकपछि पत्रकारहरुसँग बोल्दै उनले यस्तो बताएका हुन्।

महामन्त्री शर्माले कानुनले काम गरिरहेका बेला राजनीतिकर्मीहरु बोल्न नहुने पनि बताएका छन्।

‘कानुनले काम गरिररहेका बेला राजनीतिककर्मी र दलहरु चुप लाग्नु पर्छ’, उनले भने, ‘तर राजनीतिले काम गरेका बेला कानुनले बाटो बिरायौ भन्न पाउँछ। नक्कली शरणार्थीको हकमा जसले गल्ती गरे पनि कारबाही हुनु पर्छ।’

उनले नेपाल जस्तो गरिबको देशमा हुने भ्रष्टाचार गरिब जनताको घरमा चोरी हुनु जस्तै हुने पनि उदाहरण दिए।

शर्माले अब राणा शासनदेखिकै भ्रष्टाचारका फाइल खोल्न तयार हुनु पर्ने पनि बताएका छन्। ‘राणा शासनदेखिकै फाइल खोलौँ, भ्रष्टाचारको अनुसन्धानमा हदम्याद राखिनु हुन्न’, उनले अगाडि भने, ‘भ्रष्टाचार गरेको पैसाले मेरो परिवार पालिएको रहेछ भने कारबाही हुनुपर्छ, सबैलाई कारबाही हुनुपर्छ।’

शर्माले नक्कली शरणार्थी प्रकरणमा कानुनले स्वच्छन्द रुपमा काम गर्न पाउनुपर्नेमा पनि जोड दिए। ‘गणतन्त्र हो, कानुनले स्वच्छन्द रुपमा काम गर्न पाउँछ’, उनले भने, ‘विधिको विषयमा कांग्रेस‍(एमाले भन्न हुँदैन। विधिले प्रश्न उठाएपछि कोही पनि उम्किन पाउँदैन।’

नक्कली शरणार्थी प्रकरणमा नेकपा एमालेका सचिव टोपबहादुर रायमाझीपछि कांग्रेस केन्द्रीय सदस्य बालकृष्ण खाँण पनि मुछिएको विषयमा उनले कसैलाई छाड्न नहुने बताए।
‘यो वा त्यो भनेर कसैलाई बचाउन पाइँदैन। कानुनले काम गर्दा मेरो नेता कार्यकर्ता भन्न पाइँदैन’, उनले भने, ‘तर कसैमाथि भ्रष्टाचारको छानबिन गर्दा तथ्यमा आधारित हुनुपर्छ।’