काठमाडौँ : राष्ट्रिय स्वतन्त्र पार्टीका सांसद डा. स्वर्णिम वाग्लले अर्थमन्त्री प्रकाशशरण महतले वित्त नीतिमा ठाउँ छैन भन्दै मौद्रिक नीतिका उपकरणहरुबाट अगाडि जानुपर्ने भन्दै उठाएको विषय गलत रहेको वाग्लेले टिप्पणी गरे । सरकारको नीति तथा कार्यक्रमको लागि ठाउँ खोज्न सक्ने हो भने धेरै स्थान रहेको उनको भनाइ थियो । सरकार जलवायु परिवर्तन र दिगो विकासको मुद्दाबाट अगाडि बढ्न सक्नुपर्ने उनको सुझाव छ । नेपाली काँग्रेसको घोषणापत्र पढेर आर्थिक सुधारका विषयलाई अघि बढाउन वाग्लेले सुझाव दिए ।
अर्थतन्त्र संकटमा परेको बेलामा अर्थतन्त्रको स्थायित्व र स्थिरताका कुराले मात्रै न्याय गर्न नसक्ने बताएका छन् । सोमबार प्रतिनिधि सभाको बैठकमा भएको विनियोजित विधेयक २०८० का सिद्धान्त र प्राथमिकता छलफलमा बोल्दै वाग्लेले अहिलेको अर्थतन्त्रको सुधारका लागि झारफुकले नहुने र सर्जरी नै गर्नुपर्ने आवश्यकता रहेको बताए ।

‘सरकारले हिजो रातिसम्म ७ खर्ब ३३ अर्बको राजश्व संकलन गरेको छ भने १० खर्ब १६ अर्ब खर्च छ । त्यति ठूलो खाडल कसरी पूरा गर्ने रु’ वाग्लेले भने ‘कर्जा लगानी र आर्थिक वृद्धिबीचको ठूलो भ्वाङ छ । कर्जा नियमित रुपमा २२ प्रतिशत वृद्धि भइरहेको छ । अर्थतन्त्रको गतिसँग समान देखिरहेका छैनौं । कहाँ चुहिरहेको छ ।’ यी विषयमा सरकारले फरक ढङ्गले सोच्नुपर्ने र प्राथमिकता पुनःमूल्याङ्कन गर्नुपर्ने उनले बताए ।

अर्थतन्त्र समस्याग्रस्त भई लय गुमाएको अवस्थामा आर्थिक स्थायित्व र स्थिरताका कुरा गर्नु उचित नभएको उनको भनाइ छ । ‘८ प्रतिशत आर्थिक वृद्धि हुने प्रक्षेपण भएको देशमा २ प्रतिशतभन्दा कममा रूमल्लिरहेका छौं’ वाग्लेले भने ।

अब परिणात्मक विकासबाट गुणात्मक विकासमा जानुपर्ने आवश्यकता रहेको उनले बताए । सडक, विद्यालयका संरचनाभन्दा पनि गुणात्मक सेवामा जोड दिनुपर्ने उनको भनाइ छ । ‘५० को दशकमा हामीले विद्यालयको भवन माग गर्‍यौं, खानेपानी, सडक, अस्पतालको माग गर्‍यौं, तर अहिले विद्यालय छन् । थोरै भए पनि विद्यार्थी विद्यालय जान्छन् तर विद्यालयमा पढाइ हुँदैन, सिकाइ छैन । आजको चुनौति भनेको विद्यालय निर्माण गर्ने होइन, सिकाइको संकटलाई सम्बोधन गर्ने हो । स्वास्थ्य चौकी छ, दक्ष सेवा छैन ।’