काठमाडौँ, २६ वैशाख । नेकपा (एमाले)का अध्यक्ष केपी शर्मा ओलीले पार्टीले भ्रष्टाचारीलाई जोगाउने पक्षमा आफू नरहेको स्पष्ट पारेका छन् ।

राष्ट्रिय युवा संघ नेपालको पहिलो बैठकलाई सम्बोधन गर्दै उनले एमालेले कसैको पनि दोषको ढाकछोप नगर्ने बताए । “एमालेले कसैको पनि दोष र अपराधलाई ढाकछोप गर्दैन,” उनले भने, “व्यक्तिगत भ्रष्टाचारलाई एमाले पनि समर्थन गर्दैन ।”

उनले एमालेविरूद्ध षड्यन्त्र हुन्छ भने त्यसको मुकाबिला गर्न आफू तयार रहेको बताए । अध्यक्ष ओलीले भ्रष्टाचारको मुद्दामा प्रमाणले तानिनुपर्ने भन्दै केही दिनअघि गिरफ्तार भए पनि मान्छेलाई किन छाडियो भनेर प्रश्न गरे ।

उनले नक्कली भुटानी शरणार्थीका सम्बन्धमा प्रहरीलाई निष्पक्ष छानबिन गर्न दिनुपर्ने बताए । “दोषीलाई न्यायको कठघरामा उभ्यानु पर्दछ । निर्दोषलाई फसाउने कोसिस गर्नुहुँदैन,” उनले भने । अध्यक्ष ओलीले दोषीलाई कारबाही गर्न सरकारलाई आग्रह गरे ।

प्रधानमन्त्री पुष्पकमल दाहाल ‘प्रचण्ड’ले नक्कली भुटानी शरणार्थी प्रकरणमा भ्रष्टाचारीलाई कारबाही गर्ने क्रममा ट्रेलर मात्रै भएको कार्यकर्ता भेलामा भनेको समाचार आइरहेको सन्दर्भमा अध्यक्ष ओलीले आफूले प्रधानमन्त्रीको सिनेमा हलमा फिल्म हेर्न चाहेको बताए ।

अध्यक्ष ओलीले प्रश्न गर्दै भने, “फिल्म कहिले सुरू हुन्छ, मलाई बोलाएर कहिले फिल्म देखाउने ?”

पूर्वप्रधानमन्त्री ओलीले युवा संघका केन्द्रीय पदाधिकारी तथा सदस्यहरूलाई सिर्जनशील र आत्मनिर्भर बनेर समाजमा उदाहरण बन्न र युवा पुस्तालाई आफ्नो कामका आधारमा संगठनमा आबद्ध गर्ने काममा लग्न निर्देशन दिए ।