काठमाडौँ, ४ जेठ । म्यानचेस्टर सिटी साविक विजेता रियल मड्रिडमाथि समग्रमा ५–१ गोलको सानदार जित हात पार्दै च्याम्पियन्स लिगको फाइनलमा प्रवेश गरेको छ ।

प्रिमियर लिग क्लब सिटीको मैदान इत्तिहादमा गएराति भएको सेमिफाइनलको दोस्रो लेगमा मड्रिड ४–० को फराकिलो अन्तरले पराजित भयो । सान्टियागो बर्नाबेउमा भएको पहिलो लेग १–१ गोलको बराबरीमा सकिएको थियो । अवे खेलमा भने कार्लोस एन्सेलोटीको टिमले फितलो प्रदर्शन गर्‍यो ।

२३औँ मिनेटमा बर्नान्डो सिल्भाको गोलमार्फत् सिटीले अग्रता लिएको थियो । उनले केभिन डी ब्रुयानको सहयोगमा गोल गरेका हुन् । यस्तै, ३७औँ मिनेटमा सिल्भाले नै गोल गरेपटि पेप ग्वार्डिवालाको टोली पहिलो हाफमै २–० ले अघि रह्यो ।

दोस्रो हाफको सुरूवातमा मड्रिडले सिटीलाई दबावमा राखेको थियो । तर, सिटीका गोलकिपर एन्डरसनले डेविड अलावा र करिम बेन्जेमाको प्रहारलाई बचाए ।

७६औँ मिनेटमा म्यानुएल एकान्जीले गोल गरेपछि भने मड्रिडको खेलमा फर्कने सम्भावना लगभग समाप्ता हुँदा घरेलु समर्थकले जितको खुसीयाली मनाउन सुरू गरेका थिए । यो पटक पनि गोलका लागि डी ब्रुयानले नै सहयोग गरेका थिए ।

इन्जुरी समयमा वैकल्पिक खेलाडी युलियन अल्काराजले चौथो गोल थपे । उनी अर्लिङ हालान्डको स्थानमा खेल सकिन एक मिनेट बाँकी हुँदा मैदान प्रवेश गरेका थिए ।

सिटी दोस्रो पटक च्याम्पियन्स लिगको फाइनलमा पुगेको हो । यसअघि सन् २०२१ मा सिटी उपाधि भिडन्तमा प्रिमियर लिग प्रतिद्वन्द्वी चेल्सीसँग पराजित भएको थियो । गत सिजन सिटी सेमिफाइनलमा मड्रिडसँगै स्तब्ध बनेको थियो ।

अहिलेसम्म च्याम्पियन्स लिग जित्न नसकेको सिटी र इटालियन क्लब इन्टर मिलानबीच टर्कीएको इस्तानबुलमा १० जुनमा प्रतिस्पर्धा हुने छ ।