काठमाडौं । नेपाली कांग्रेसभित्र पार्टीसम्बन्धी विवाद सर्वोच्च अदालतमा पुगेपछि ‘अदालतमा सेटिङ गरिएको’ भन्ने आरोपलाई लिएर संस्थापन र इतर पक्षबीच आरोप–प्रत्यारोप चर्किएको छ।

कांग्रेसको आधिकारिकता र पार्टीभित्रको विवाद सर्वोच्च अदालतमा विचाराधीन रहेका बेला पूर्वसभापति शेरबहादुर देउवा र तत्कालीन कार्यवाहक सभापति पूर्णबहादुर खड्काले महाधिवेशन रोक्न माग गर्दै निवेदन दिएका थिए। देउवा पक्षले पुनः सर्वोच्च अदालतको ढोका ढकढकाएपछि अदालतमा ‘सेटिङ’ गरिएको आरोपसमेत सार्वजनिक रूपमा उठ्न थालेको छ।

इतर पक्षकी केन्द्रीय सदस्य कुसुम थापाले अदालतमा प्रभाव पार्न सकिने किसिमको अभिव्यक्ति नदिन चेतावनी दिएकी छन्। उनले पूर्णबहादुर खड्कालाई लक्षित गर्दै पैसा र पहुँचका आधारमा अदालतका कर्मचारीदेखि न्यायाधीशसम्म मिलाउन सकिने भन्दै प्रचार नगर्न आग्रह गरेकी हुन्।

तर देउवा पक्षका नेता दीपक खड्काले यस्तो आरोपप्रति कडा आपत्ति जनाएका छन्। देउवा पक्षका तर्फबाट सर्वोच्च अदालतमा रिट निवेदन दर्ता गराएका खड्काले न्याय माग्न सर्वोच्च अदालत पुगेको विषयलाई ‘अदालत सेटिङ’सँग जोडेर प्रचार गर्नु स्वतन्त्र न्यायपालिकाको मानमर्दन गर्ने प्रयास भएको बताएका छन्।

उनले सामाजिक सञ्जालमार्फत प्रतिक्रिया दिँदै भनेका छन्, ‘सम्मानित सर्वोच्च अदालतमा आज उत्प्रेषण, प्रतिषेध र परमादेश समेत माग गरी न्याय खोज्दा उल्टै स्वतन्त्र न्यायपालिकाको मानमर्दन हुने, अविश्वास पैदा गर्ने उद्देश्यले केही व्यक्ति तथा समूहले नियोजित रूपमा अदालत सेटिङ गरेको भन्दै मेरो समेत नाम जोडेर गरिएको प्रचारप्रति गम्भीर ध्यानाकर्षण भएको छ।’

खड्काले उक्त प्रचारलाई योजनाबद्ध कुप्रचारको संज्ञा दिँदै न्यायालयको गरिमा घटाउने प्रयासप्रति सचेत रहन आग्रह गरेका छन्। आफू न्याय र स्वतन्त्रताका लागि लडेको व्यक्ति भएको उल्लेख गर्दै उनले सर्वोच्च अदालतप्रति पूर्ण विश्वास रहेको बताएका छन्।

उनले भनेका छन्, ‘न्याय र स्वतन्त्रताको लागि लडेको एक सिपाहीको नाताले सबै अदालतप्रति उत्तिकै विश्वास र भरोसा छ। सम्मानित सर्वोच्च अदालतले न्याय दिनेमा पूर्ण विश्वस्त छु।’

‘न्यायालयलाई छोड्नुस्’ : केदार कार्की

कांग्रेसका अर्का नेता केदार कार्कीले पनि अदालतलाई राजनीतिक आरोप–प्रत्यारोप र ‘मिडिया ट्रायल’को विषय नबनाउन आग्रह गरेका छन्।

उनले केही व्यक्तिहरूले सार्वजनिक बहसका लागि सामग्री उत्पादन गर्ने उद्देश्यले अदालतलाई समेत विवादमा तान्न खोजेको आरोप लगाए।

कार्कीले भनेका छन्, ‘सधैं अराजक अभिव्यक्ति र मिडिया ट्रायल गराउने केही काठमाडौंका बुद्धि व्यवसायीहरूले कन्टेन्ट बनाएर फेरि अदालतमा आक्रामक गराउनु दुर्भाग्य हो। सबैमा एउटै फर्मुला लागू हुँदैन।’

उनले संस्थापन पक्षका नेताहरूलाई लक्षित गर्दै राजनीतिक अडान स्थिर हुनुपर्ने टिप्पणीसमेत गरेका छन्। उनका अनुसार, पार्टीभित्र अग्रज र समकक्षी नेताविरुद्ध गरिने राजनीतिक आक्रमणको शैली न्यायालयमाथि प्रयोग गर्न खोज्नु उचित हुँदैन।

‘विचार त अडानमा भर पर्छ। लास र दास लगाएर अग्रज नेता, समकक्षीलाई गाली गराएजस्तो अदालतमा हुँदैन,’ कार्कीले भनेका छन्, ‘त्यो गल्ती नगर्दा राम्रो। न्यायालयलाई त छोड्नुस्।’

पार्टीको आन्तरिक विवाद सर्वोच्च अदालतमा प्रवेश गरेसँगै नेपाली कांग्रेसभित्रको शक्ति संघर्ष अब राजनीतिक तहमा मात्र सीमित नरही न्यायिक प्रक्रियामाथिको आरोप–प्रत्यारोपसम्म पुगेको देखिएको छ। अदालतको निर्णय आउनुअघि नै ‘सेटिङ’ र प्रभावको आरोप सार्वजनिक रूपमा उठ्न थालेपछि कांग्रेसभित्रको विवाद थप तिक्त बन्ने संकेत देखिएको छ।

Originally published on abcnews.com.np.