काठमाडौँ, ६ जेठ । राजस्थान रोयल्सले इन्डियन प्रिमियर लिग (आइपिएल)–२०२३ को प्लेअफ दौडबाट आफ्नो आशा जीवित राखेको छ भने पञ्जाब किंग्स दौडबाट बाहिरिएको छ । राजस्थान रोयल्सले चालु सिजनको ६६औँ खेलमा पञ्जाब किंग्सलाई ४ विकेटले पराजित गरेको हो ।

यो जितसँगै राजस्थान तालिकाको पाँचौँ स्थानमा पुगेको छ । लिगका सबै खेल खेलेपछि उनको खातामा १४ अंक छ भने पञ्जाबले १२ अंक मात्र जोड्न सकेको छ । यस्तो अवस्थामा पञ्जाब प्लेअफको दौडबाट बाहिरिएको छ । प्लेअफमा प्रवेश गर्न राजस्थानले अब मुम्बईको हार र बैंगलोरको ठुलो हारको लागि प्रार्थना गर्नुपर्ने छ ।

हिमाञ्चल प्रदेशस्थित धर्मशाला मैदानमा राजस्थानले टर जितेर फिल्डिङ रोजेको थियो । पहिले ब्याटिङ गरेको पञ्जाबले २० ओभरमा ५ विकेट गुमाएर १८७ रन बनाएको थियो । सुरूवाती ब्याटर नचले पनि मध्यक्रमका खेलाडीले पारी उकासेका थिए । साम करनले ४९ बनाउँदा जितेन शर्माले ४४ तथा साहरूख खानले ४१ रन जोडे ।

राजस्थानका नवदीप सैनीले ३ विकेट लिए । ट्रेन्ट बोल्ट र एडम जाम्पाले एक–एक विकेट हात पारे ।

जबाफमा राजस्थानले १९.४ ओभरमा ६ विकेट गुमाएर १८८ रनको लक्ष्य पूरा गर्‍यो । ओपनर यजश्वी जैसवाल र देवदत्त पाडिक्कलले अर्धशतकीय पारी खेले । जैसवाले ३६ बलमा ५० रन बनाए । पाडिक्कलले ३० बलमा ५१ रन जोडे । यस्तै सिम्रन हिटमेयरले ४६ रनको इनिङ खेले ।

पञ्जाबका कगिसो रबडाले २ विकेट लिए भने साम करन, अर्शदीप सिंह र नाथन एलिसले एक–एक विकेट लिए ।