काठमाडौँ, ८ जेठ । शुभमन गिलले शतक प्रहार गरेपछि इन्डियन प्रिमियर लिग (आइपिएल)–२०२३ को अन्तिम लिग खेलमा गुजरात टाइटन्सले रोयल च्यालेन्जर्स बेंगलोरलाई ६ विकेटले पराजित गरेको छ ।

बेंगलोरमा घरेलु टोलीले दिएको १९८ रनको लक्ष्य गुजरातले ५ बल बाँकी छँदा ४ विकेटको क्षतिमा पूरा गर्‍यो । गुजरातको जितमा शुभमन गिल ५२ बलमा ८ छक्का र ५ चौकासहित १०४ नटआउट रहे । गिलको यो लगातार दोस्रो शतक हो । गिलले यसअघि सनराइजर्स हैदरावादविरूद्ध १०१ रनको शतकीय इनिङ्स खेलेका थिए ।

यस्तै, विजय शंकरले ५३, ऋद्धिमान साहाले १२ रनको पारी खेल्दा डेविड मिलर ६ रनमा आउट भए ।

बेंगलोरका मोहम्मद सिराजले २ विकेट लिए । जियकुमार वैश्यक र हर्षल पटेलले समान एक विकेत लिए ।

त्यसअघि टस हारेर पहिला ब्याटिङको निम्तो पाएको घरेलु टोली बेंगलोरले निर्धारित २० ओभरमा ५ विकेट गुमाउँदै १९७ रन बनायो । बेंगलोरका विराट कोहली ६१ बलमा एक छक्का र १३ चौकासहित सर्वाधिक १०१ रनमा नटआउट रहे । कोहलीको योसँगै आइपिएलमा सर्वाधिक ७ शतक प्रहार गर्ने ब्याटर बनेका छन् ।

उनीपछि क्रिस गेलले ६ र जस बटलरले ५ शतक प्रहार गरेका छन् । कोहलीको यो लगातार दोस्रो शतकसमेत हो । तर, बेंगलोर बाहिरिनु पुग्यो । फाफ डु प्लेसिस २८, माइकल ब्रेसवेल २६, ग्लेन म्याक्सवेल ११ रनमा आउट भए । अनुज रावत १५ बलमा १ छक्का र १ चौकासहित २३ रनमा नटआउट रहे ।

हारसँगै बैंगलोर प्रतियोगिताबाट बाहिरियो भने मुम्बईले प्लेअफमा स्थान बनायो ।

गुजरात १४ खेलमा १० मा जित र ४ मा हारसहित २० अंकका साथ शीर्ष स्थानमा रह्यो । चेन्नई ८ मा जित र ५ मा हरसहित १७ अंकका साथ दोस्रो स्थानमा रहँदा समान १७ अंक भए पनि लखनऊ रनरेटमा पछि पर्दै तेस्रो स्थानमा रह्यो । मुम्बई १४ खेलमा ८ मा जित र ६ मा हारसहित १६ अंकका साथ चौथो स्थानमा रह्यो । १४ अंक जोडेर पाँचौँ स्थानमा रहेको बेंगलोर बाहिरियो ।

शीर्ष स्थानको गुजरात र दोस्रो स्थानको चेन्नईबीच क्वालिफार हुने छ । जित हात पार्ने टोली फाइनलमा पुग्ने छ भने पराजित हुने टोली दोस्रो क्वालिफायरमा पुग्ने छ ।

लखनऊले एलिमिनेटरमा मुम्बईसँग खेल्ने छ । एलिमिनेटरमा जित हात पार्ने टिमले दोस्रो क्वालिफायर खेल्नेछ भने हार्ने टोली बाहिरिने छ । दोस्रो क्वालिफारयको विजेता टोली फाइनल पुग्ने छ ।