नयाँ दिल्ली १८ जेठ । भारतीय प्रधानमन्त्री नरेन्द्र मोदीले अबको १० वर्षमा भारतले नेपालबाट १० हजार मेगावाट बिजुली किन्ने घोषणा गरेका छन् ।

भारत भ्रमणका क्रममा रहेका नेपालका समकक्षी पुष्पकमल दाहाल प्रचण्डसँग भएको संयुक्त पत्रकार सम्मेलनका क्रममा मोदीले नेपालको विकासमा भारतले हरतरहले सहयोग गर्ने प्रतिवद्धता जनाए ।

‘नेपालबाट भारतमा बिजुली निर्यातको विकल्प बनाउन हामीलाई पूर्वाधार चाहियो। हाम्रो पार्टरनशिपलाई सुपर हिट बनाउन महत्वपूर्ण निर्णय लिइएको छ’, उनले भने, ‘भारत र नेपालबीच लङटर्म पावर ट्रेड एग्रिमेन्ट सम्पन्न भएको छ। हामीले आउने १० वर्षमा नेपालबाट १० हजार मेगावाट बिजुली आयात गर्ने छौँ।’

त्यसकै लागि दुई देशबीच फुकोट कर्णाली र तल्लो अरुण जलविद्युत् आयोजना निर्माणका लागि हस्ताक्षर भएको छ।

भारतीय प्रधानमन्त्री मोदीले नेपालको जलश्रोत भारतका लागि अतिमहत्वपूर्ण भएको बताउँदै यसमा मिलेर काम गर्ने पनि बताएका छन्।

प्रचण्डले मोदीलाई दिए नेपाल भ्रमणको निम्तो

प्रधानमन्त्री पुष्पकमल दाहाल प्रचण्डले भारतीय समकक्षी नरेन्द्र मोदीलाई नेपाल भ्रमणको निम्तो दिएका छन्।

भारत नेपालको सबैभन्दा नजिकको छिमेकी मात्रै नभएर सबैभन्दा ठूलो व्यापारिक साझेदार भएको उनले बताउँदै उनले चाँडै मोदीलाई नेपाल भ्रमणमा स्वागत गर्ने उनले बताए।

दिल्लीस्थित हैदरावाद हाउसमा भएको संयुक्त पत्रकार सम्मेलनमा उनले चाँडै बंगलादेशसम्म बिजुली निर्यातका लागि त्रिपक्षीय सहमति हुने बताएका थिए।

अरुण, भारतीय बाटो हुँदै बंगलादेशसम्म बिजुली निर्यात, ४८० मेगावाटको फुकोट कर्णाली, पञ्चेश्वर बहुद्देश्यीय आयोजना, पेट्रोलियम पाइपलाइन, सीमा समाधानलगायत विविध विषयमा सहमति भएको उनले बताएका थिए।