पोखरा ३१ जेठ । नेपाल समाजवादी पार्टीका अध्यक्ष तथा पूर्वप्रधानमन्त्री बाबुराम भट्टराईले पुराना कुरालाई कोट्याएर देशलाई पुनः द्वन्द्वमा लैजान खोजिएको टिप्पणी गरेका छन् ।

गृहजिल्ला गोरखाका केही मतदातासंगको अन्तरक्रियामा रहेका भट्टराईले द्वन्द्वसम्बन्धी मुद्दा वृहत् शान्ति सम्झौतापछिको सत्य निरूपण, मेलमिलाप तथा बेपत्ता छानबिनसम्बन्धी आयोगले सम्बोधन गरिसकेपछिको अवस्थामा फेरि कोट्याउनु मनासिब नरहेको बताए ।

‘अब हामीले सबै कुरालाई कोट्याएर एक–एक गर्दै मुद्दा मामिलामा गयौँ भने त्यसको अर्थ फेरि द्वन्द्वमा जाने भन्ने हुन्छ । त्यो अत्यन्त गैरजिम्मेवारीपूर्ण कुरा हुन्छ,’ संचारकर्मीसँग कुराकानी गर्दै उनले भने, ‘मलाई के विश्वास छ भने जिम्मेवार निकायहरूले यो कुरा बुझ्छन् । बरु छिटो यो कुरालाई आयोगमार्फत टुङ्ग्याइनुपर्छ भन्ने लाग्छ ।’

भट्टराईले प्रधानमन्त्री पुष्पकमल दाहाल प्रचण्ड र आफूविरुद्ध युद्धको क्रममा बाल सैनिकको प्रयोग गरेको आरोपमा सर्वोच्चमा परेको मु्द्दालाई आफूले खासै महत्व नदिएको समेत बताएका छन् । ‘यो महत्व दिन लायक विषय नै होइन । त्यसैले मैले यसलाई ठूलो महत्व दिएर हेरेको छैन,’ उनले भने ।

साथै, पूर्वप्रधानमन्त्री भट्टराईले सरकारले सार्वजनिक गरेको बजेटलाई लिएर त्यति उत्साहित हुनुपर्ने कारण नभएको समेत बताएका छन् । ‘यो पटकको नीति कार्यक्रम तथा बजेटलाई त्यति उत्साहपूर्ण मान्न सकिन्न । कारण, यो पुरानै शैलीमा आएको छ । यसलाई लिएर खास ठुला आशा गर्न सकिन्न,’ उनले भने, ‘यद्यपि, गोरखाको हकमा बजेटले गरेको सम्बोधनलाई नराम्रो भनिरहन जरुरी छैन ।’

अर्को प्रसंगमा संचारकर्मीले सोधेको प्रश्नको जवाफ दिँदै भट्टराईले यो पटकको गृहजिल्लाको भ्रमण रणनीतिक पुर्वाधारहरूको स्थितिबारे जान्नको लागि भएको प्रतिक्रिया दिए । उनले दुधपोखरी सडक, मध्यपहाडी लोकमार्ग, आरुघाट–लार्के, दरौँदी–लाप्राक र चेपे किनार सडकसँगै अन्य सडक परियोजनाहरू गोरखाका लागि रणनैतिक महत्वका भएका कारण त्यसको प्रगति चाँडो हुनुपर्ने बताए ।