काठमाडौँ २५ असार । प्रधानमन्त्री पुष्पकमल दाहाल प्रचण्डले अघिल्ला दुइ पटक जस्तै यसपटक पनि आफू लामो समयका लागि प्रधानमन्त्री बन्छु भन्ने नसोचेको बताएका छन् । प्रतिनिधिसभाको सोमबारको बैठकमा आफ्नो विवादास्पद अभिव्यक्तिबारे स्पष्टीकरण दिँदै प्रधानमन्त्री प्रचण्डले आफू जति समय प्रधानमन्त्री हुन्छु, ती समयमा भ्रष्टचार विरोधी अभियान चलाइरहने प्रतिवद्धता जनाए ।

‘म पहिल्यै दुई पटक प्रधानमन्त्री भइसकेको हुँ, तर परिस्थितिवश मलाई प्रधानमन्त्री बन्नुपर्ने परिस्थिति आइलाग्यो । म तेस्रो पटक प्रधानमन्त्री हुँदा मैले जनतालाई केही भन्नु छ, के गर्नु छ भनेर भनेको थिएँ, त्यही अनुसार गर्दै आएको हुँ,’ उनले भने, ‘मलाई थाहा छ, म सधैँको लागि प्रधानमन्त्री भएको होइन, अहिले पनि मलाई लामो समय प्रधानमन्त्री हुन्छु भन्ने लागेको छैन । तर जति समय हुन्छु, यो पटक म जनताको पक्षमा काम गरेर देखाउँछु भन्ने ठानेको छु । त्यही गर्दैछु ।’

प्रधानमन्त्री प्रचण्डले मिटरब्याज पीडितहरूको सम्बन्धमा आफू स्वयम् र अहिलेको सरकार गम्भीर रहेको बताए ।

‘मिटर ब्याजपीडितहरूको आन्दोलन लामो समयसम्म किन चल्यो रु भनेर सत्ता गठबन्धनमै मैले प्रश्न गरेको थिएँ । यो विषयमा म र सरकार गम्भीर छौं । अहिले प्रतिपक्ष दलहरूले पनि यति प्रतिबद्धता देखाइसकेपछि मिटरब्याज सम्बन्धी कानुन संसद्‍बाट पास हुन्छ भन्नेमा म ढुक्क भएको छु,’ उनले भने ।

मिटरब्याजको गम्भीर प्रकृतिको अवस्था बुझेरै सरकारले हतारमा अध्यादेशमार्फत् कानुन ल्याएर कारबाही अघि बढाएको पनि उनले बताए ।

यस क्रममा प्रधानमन्त्री प्रचण्डले भारतीय सरदार प्रितम सिंहको विषयमा दिएको विवादित अभिव्यक्ति भावनामा आएर बाहिरिएको भन्दै स्पष्टीकरण दिएका छन् । तर आफू सार्वभौमसत्ताका लागि सधैँ प्रतिबद्ध रहेको लामो फेहरिस्त समेत संसदमा प्रधानमन्त्रीले सुनाएका थिए ।