काठमाडौं ८ साउन । नेपाली कांग्रेसका महामन्त्री गगनकुमार थापाले गठबन्धनका नाममा पार्टीले आफ्नो स्वार्थमा सम्झौता गर्न नहुने बताएका छन्।

सोमबार बसेको केन्द्रीय कार्यसमितिको बैठकमा नेताहरुले उठाएका प्रश्नको जवाफ दिने क्रममा उनले यस्तो बताएका हुन्।

उनले अहिलेको सत्तारुढ गठबन्धनको नेता कांग्रेस नै भएको बताएका छन्। ‘यो गठबन्धनको नेता कांग्रेस हो। प्रधानमन्त्री आउने जाने क्रम चल्छ, चलिरहन्छ तर गठबन्धनको नेता कांग्रेस हो’, उनले भने, ‘गठबन्धन दलभित्र रहेका कुनै अमुक दलको माग पूरा गर्ने नाममा आफ्नो स्वार्थमा सम्झौता गर्नु हुँदैन। विगतमा कांग्रेसले केही कुरामा सम्झौता गरेको छ। त्यस्तो कुरामा कांग्रेसले मान्दैन भन्न सक्नुपर्छ।’

थापाले प्रदेशमा सरकार ढले स्वीकार्नुपर्ने तर मन्त्रालयहरु बढाउने कुरामा सम्झौता गर्नु गलत हुने पनि बताए।

‘कांग्रेसमा सरकार चलाउने मात्रै होइन ठूलो जिम्मेवारी पनि छ। हामीलाई नतिजा चाहिएको छ। हाम्रो पार्टीबाट नि र्वाचित २६ सय ६८ वडाअध्यक्ष र १० हजार वडासदस्य छन्’, उनले भने, ‘अब कांग्रेस भ्रष्टाचारविरुद्ध निर्मम हुनुपर्छ। सुशासनका लागि कांग्रेस प्रतिवद्ध हुनुपर्छ।’

सभापति तथा दलका नेता देउवालाई संसदीय दलको नेता फेर्ने कुरा नौलो नरहे पनि उनी निकट नेताहरूले भने प्रश्न गर्न लागेको थापाले बताए । ‘सभापतिले आफू फेर्दै गरेकाले यसले प्रयास गर्छ भन्ने लागेको छ । अरुले कति चिन्ता गर्नुभएको हो ?,’ उनले प्रश्न गरे ।

संसदीय दलको नेता फेर्ने प्रयास गरिरहने थापाले बताए । उनले सांसदहरूको मत पाउने कुरा गाह्रो भएको बताए । मतदाताको बीचमा भोटिङ भए अर्कै कुरा हुनेथियो तर सांसदको मत पाउन झन् गाह्रो हुने बताए । गाह्रो काम भनेर संसदीय दलको नेता परिवर्तन गर्ने अभियानबाट पछि नहट्ने उनको भनाइ थियो ।