काठमाडौं, २२ माघ । प्रदेश नम्बर १ को प्रदेशसभा सभामुख र उपसभामुखको निर्वाचन माघ २९ गते हुने भएको छ ।

विराटनगरस्थित जिल्ला समन्वय समितिको भवनमा सोमबार बसेको पहिलो बैठकले सभामुख र उपसभामुखको निर्वाचनको मिति तय गरेको हो । बैठकले प्रदेश सभा कार्यसञ्चाल अन्तरिम कार्य विधि पनि पारित गरेको छ । त्यस्तै सहसचिव धु्रबु घिमिरेलाई संघीय संसद सचिवालय सचिवको अख्तियारी पनि बैठकले दिएको छ ।

यसअघि पहिलो संसद बैठकमा बोल्दै सांसदहरुले यो प्रदेशलाई सबैले एकजुट भएर समृद्ध बनाउनुपर्नेमा जोड दिएका छन् । नेपाली कांग्रेस, माओवादी केन्द्र र अन्य मधेसवादी दलका सांसदहरुले अबको ध्यान प्रदेशको समृद्धितर्फ केन्द्रित हुनुपर्ने बताएका हुन् ।

प्रदेश सं‌सद बैठकको अध्यक्षता ज्येष्ठ सदस्य ओमप्रकाश सरवागीले गर्नुभयो । प्रदेश १ मा ९३ जना सांसद रहेका छन् । प्रदेश सभामा एमालेबाट ५१, कांग्रेस २१, माओवादी केन्द्र १६, संघीय समाजवादी फोरम ३, राप्रपा र संघीय लोकतान्त्रिक राष्ट्रिय मञ्चबाट १–१जना सांसद छन् ।