मुख्यमन्त्री कार्कीले पराजुलीलाई स्वास्थ्य मन्त्रालयको जिम्मेवारी दिएका छन्। यसअघि पराजुलीले सम्हाल्दै आएको आन्तरिक मामिला तथा कानुन मन्त्रालय नेकपाको भागमा परेपछि गोम्बु शेर्पालाई नयाँ मन्त्री नियुक्त गरिएको छ।

नवनियुक्त अन्य मन्त्रीहरूले सोमबार नै कार्यभार सम्हाले पनि पराजुली भने अहिलेसम्म स्वास्थ्य मन्त्रालय पुगेका छैनन्। उनी शपथग्रहण कार्यक्रममा समेत ढिला गरी सहभागी भएका थिए। आन्तरिक राज्यमन्त्री उमाकान्त गौतम पनि मन्त्रालय पुगेका छैनन्।

वरीयता र सहमतिबिनाको हेरफेरप्रति आपत्ति

मन्त्री पराजुलीले आफूलाई वरीयतामा पछाडि पारिएको तथा आफ्नो सहमतिबिनै मन्त्रालय हेरफेर गरिएको भन्दै असन्तुष्टि व्यक्त गरेका छन्।

स्वास्थ्य मन्त्रालयको कार्यकक्षसमेत पूर्ण रूपमा तयार नभएको उनले बताएका छन्। स्वास्थ्य मन्त्रालय केही समयअघि जनस्वास्थ्य कार्यालयको पुरानो भवनबाट भाडाको घरमा सारिएको भए पनि आवश्यक व्यवस्थापनको काम पूरा नभएको उनको भनाइ छ।

‘म अहिलेसम्म मन्त्रालय गएको छैन। प्रदेश सांसद र मन्त्री पार्टीले नै बनाएको हो, त्यसैले पार्टीसँग सल्लाह गरेर मात्र मन्त्रालय जान्छु। यो व्यक्तिगत कुरा होइन। पार्टीले जा भन्दा जाने हो, नजा भन्दा नजाने हो,’ पराजुलीले भने।

उनले बुधबारसम्ममा विषय टुंगिने बताएका छन्।

मुख्यमन्त्रीसँग सम्बन्ध चिसिएको चर्चा

यसअघि मुख्यमन्त्री हिक्मत कार्कीलाई हटाउने प्रयासमा मन्त्री पराजुलीसमेत सक्रिय रहेको बताइएको थियो। त्यसयता कार्की र पराजुलीबीचको सम्बन्ध चिसिएको चर्चा हुँदै आएको छ।

सरकारमा नेकपा सहभागी भएपछि भएको मन्त्रालय भागबन्डामा पराजुलीको जिम्मेवारी परिवर्तन भएसँगै उनी थप असन्तुष्ट बनेका हुन्।