काठमाडौं १६ साउन । नेकपा माओवादी केन्द्रको पार्टी महाधिवेशन भएको झण्डै दुई वर्ष पुग्ने लाग्दा माओवादी केन्द्रले केन्द्रीय सदस्यको टुंगो लगाएको छ।

मंगलबार पार्टीको केन्द्रीय कमिटीको बैठक सुरू हुनुअघि केन्द्रीय सदस्यलाई परिचयपत्र वितरण गर्ने क्रममा माओवादीले आफ्ना पार्टीका केन्द्रीय सदस्य को को हुन् भनेर पहिचान गरेको हो।
सत्तारुढ नेकपा माओवादी केन्द्रको केन्द्रीय समिति बैठकमा ७ सय ५८ जना नेताहरु सहभागी हुने भएका छन्।

बुधबारदेखि काठमाडौंको प्रज्ञा भवनमा सुरु हुने केन्द्री समिति बैठकमा ३८५ जना केन्द्रीय सदस्य, १९८ वैकल्पिक केन्द्रीय सदस्य, प्रदेश समितिका १०० जना पदाधिकारी तथा निर्वाचन आयोग, अनुशासन आयोग र लेखा आयोगका ७५ जना गरी ७ सय ५८ जनाले भाग लिने भएका हुन्।

माओवादी केन्द्रीय कार्यालयका सचिव डोरप्रसाद उपाध्यायका अनुसार बैठक बुधबार बिहान ११ बजे सुरु हुनेछ।
माओवादीको केन्द्रीय समिति बैठक १३ महिनापछि बस्न लागेको हो। यसअघि माओवादीले २०७९ असार १९ गतेदेखि केन्द्रीय समिति बैठक राखेको थियो।

पार्टी कार्यालय प्रमुख श्रीराम ढकालले सबै केन्द्रीय सदस्यहरूको कार्ड छपाइको काम सकिएको र आफ्नो पार्टीमा ३८७ जना केन्द्रीय सदस्य रहेको जानकारी दिए।

यसअघि गत पुसमा भएको पार्टी महाधिवेशनमा २९९ सदस्यीय केन्द्रीय सदस्य बनाउने प्रस्ताव भएको थियो। त्यसयता पार्टी अध्यक्ष पुष्पकमल दाहाल प्रचण्डले अन्धाधुन्ध केन्द्रीय सदस्य मनोनयन गर्दा त्यसको संख्या झण्डै साढे पाँच सय पुगेको थियो। तर यसको रेकर्ड कतै पनि राखिएको थिएन।

अहिले केन्द्रीय कमिटीको बैठक सुरू हुनुअघि ती सदस्यहरूबारे अध्ययन गरेर संख्या निर्धारण गरिएको छ।

माओवादीको केन्द्रीय कमिटी बैठक बुधबार प्रज्ञा प्रतिष्ठान कमलादीमा बस्दैछ। माओवादीले पहिलो पटक केन्द्रीय समितिको बैठक फेसबुकमार्फत लाइभ गर्ने भएको छ । यस अघि गत हप्ता भएको अर्को सत्तारुढ दल नेपाली कांग्रेसले पनि आफ्नो बैठक लाइभ गरेको थियो ।
माओवादी बैठक लाइभ गर्ने निर्णयबाट कतिपय केन्द्रीय सदस्यहरु असन्तुष्ट देखिएका छन् ।