काठमाडौँ १९ साउन । प्रधानमन्त्री पुष्पकमल दाहाल प्रचण्डले क्विन्टल सुन तस्करीको अनुसन्धान प्रहरीको सिआइवीबाट गर्न निर्देशन दिएका छन् । सुन तस्करी प्रकरण संगठित अपराध र अन्तर्देशीय अपराध भएकोले त्यसका मुख्य अभियुक्तहरुसम्म पुग्ने गरी प्रहरीमार्फत अनुसन्धान गर्न प्रधानमन्त्री प्रचण्डले निर्देशन दिएका हुन् । क्विन्टल सुन प्रकरणको पटाक्षेपा र अनुसन्धान राजस्व अनुसन्धान विभागमार्फत हुंदै आएको थियो ।

विभागबाट भइरहेको अनुसन्धानले अपराधमा संलग्नको नेक्सस पत्ता लगाए पनि यो संगठित र अन्तरदेशीय अपराध भएकोले जरैसम्म पुग्न प्रहरीको केन्द्रीय अनुसन्धान ब्युरोबाट अनुसन्धान हुनुपर्ने प्रधानमन्त्री प्रचण्डको धारणा थियो ।

सर्वोच्च अदालतका प्रधानन्यायाधीश नियुक्ति सिफारिस गर्न बिहीबार साँझ सिंहदरबारमा संवैधानिक परिषद् बैठक लगत्तै प्रधानमन्त्रीले क्विन्टल सुन प्रकरणमा भइरहेको अनुसन्धान लगायतको समीक्षा गर्न उपप्रधान तथा रक्षामन्त्री पूर्णबहादुर खड्का, उपप्रधान तथा गृहमन्त्री नारायणकाजी श्रेष्ठ, महान्यायाधिवक्ता दिनमणि पोखरेल, प्रहरी महानिरीक्षक बसन्तबहादुर कुँवर, केन्द्रीय अनुसन्धान ब्युरो प्रमुख एआईजी किरण बज्राचार्य र राजस्व अनुसन्धान विभागका महानिर्देशक नवराज ढुंगानासँग परामर्श गरेका थिए ।

प्रहरी महानिरीक्षक कुँबरले सुन तस्करी मात्र नभएको यो संगठित अपराध र अन्तरदेशीय अपराध मात्रै नभएर आतंकवादी गतिविधिमा संलग्न गिरोहको समेत संलग्नता हुनसक्ने भन्दै प्रहरीबाटै छानविन हुंदा अनावश्यक शंका नहुने सुझाव दिएका थिए ।

‘यो अपराधमा प्रमाणले ज–जसलाई देखाउँछ, माओवादीका नेता वा अरु को–को पर्छ, अघि बढ्नुस् । सरकारबाट पूर्ण सहयोग रहन्छ,’ प्रधानमन्त्री प्रचण्डको भनाई उद्धृत गर्दै एक मन्त्रीले भने ‘सम्भवतः केहीदिनभित्रै थप अनुसन्धानको जिम्मा विभागले प्रहरीलाई दिने छ ।’

तर, हङकङ, चीन, दुबई र भारतमा रहेको गिरोहले नेपाललाई ट्रान्जिट बनाएर सुन ल्याएको र यसको गन्तव्य भारतीय बजार रहेका अनुसन्धानबाट खुलेका केही तथ्यले देखाइसकेको छ ।