काठमाडौ, ४ साउन । सानोठिमीस्थित बाल सुधार गृहबाट २२० जना कैदी भागेका छन्।
२ सय कैदीबन्दीहरु भागेपछि भक्तपुरदेखि काठमाडौंसम्मै तनाव भएको छ।
भागेकामध्ये अहिलेसम्म प्रहरीले भक्तपुर र काठमाडौंबाट ९२ जनालाई फेरि पक्राउ गरिसकेको छ।
लाठी र भालासहित ढोका फोडेर निस्किएका उनीहरुले बन्दीगृहको पछाडिको ढोका फुटाएका थिए।
भक्तपुरका सहायक प्रमुख जिल्ला अधिकारी डोरेन्द्रप्रसाद निरौलाका अनुसार अझै १२८ जना फरार रहेका छन्।
बन्दीगृहका ४३ जना कैदीहरु भने भागेका छैनन्। उनीहरुलाई अहिले सशस्त्र प्रहरीले सुरक्षा दिइरहेको छ।
तनावका क्रममा सशस्त्र प्रहरी, प्रहरी र कैदीबन्दीसहित २१ जना घाइते भएका छन्। भाग्ने क्रममा कैदीहरुलाई रोक्न खोज्दा प्रहरी पनि घाइते भएका हुन्।
कैदी भाग्ने क्रममा झडप हुँदा सशस्त्र प्रहरीका ८ जना, नेपाल प्रहरीका ७ जना र ६ कैदीबन्दी घाइते भएका छन्।
सुधार गृहमा जम्मा २९८ जना कैदीबन्दीलाई राखिएको थियो। तीमध्ये ४३ जना महिला छन्।
भागेका कैदीबन्दीहरु लाठी र भालासहित काठमाडौंको कोटेश्वरसम्म आइपुगेका थिए।
उनीहरुलाई भक्तपुर प्रहरीले पछ्याएर पक्राउ गरेको हो।
आइतबार रामेछापको मन्थली नगरपालिका–३, कठजोरका कमल बस्नेतको रहस्यमय मृत्यु भएपछि बालसुधार गृह तनावपूर्ण बनेको हो।
बालसुधार गृहभित्रका थुनुवाले सोमबार दिउँसो बन्दीगृह प्रशासनविरुद्ध नाराबाजी र तोडफोड गर्दै बाहिर निस्किँदा सुरक्षार्थ खटिएको प्रहरीले रोक्न खोजेको थियो।
झडपपछि आक्रोशित भएका कैदीबन्दीले प्रहरीलाई लखेटेर बाहिर निस्किएका थिए।
सुधारगृहले आइतबार बिहान बस्नेतको परिवारलाई उनको मृत्युको खबर दिएको थियो। तर उनको मृत्युको कारण पुष्टि नगरिएपछि आफन्त र कैदीबन्दी आक्रोशित थिए।
आइतबार जिल्ला सुरक्षा समितिका संयोजक प्रमुख जिल्ला अधिकारी खगेन्द्रप्रसाद रिजालको अध्यक्षतामा बसेको बैठकले सहायक प्रमुख जिल्ला अधिकारी डोरेन्द्रप्रसाद निरौलाको नेतृत्वमा एक छानबिन समिति बनाएको थियो।
बाहिरी उक्साहटमा लागेर सुधार गृहमा रहेकाहरुलाई उपद्रो नगर्न प्रमुख जिल्ला अधिकारी रिजालले आग्रह गरेका थिए।
छानबिन समितिले सत्यतथ्य बाहिर ल्याउने बताउँदै संयमित बन्न र कानुनबाहिर नजान रिजालले भनेका थिए।
प्रतिक्रिया दिनुहोस्