स्याङ्जा, २४ माघ । फेदीखोला गाउँपालिका–२ स्थित सिद्धार्थ माध्यामिक विद्यालयका लागि बिदेशमा कार्यरत भूतपूर्व विद्यार्थीहरूले व्यक्तिगत सहयोगमा दुई कोठे आइसीटी भवन बनाई हस्तान्तरण गरेका छन् ।

कूल ३१ लाख ४३ हजार ४७० रुपैयाँ लागतको सो भवन उनीहरूले विद्यालयको ४३औं वार्षिकोत्सवको अवसर पारेर व्यवस्थापन समितिलाई हस्तान्तरण गरेका हुन् । भूपू विद्यार्थीहरुले वार्षिकोत्सवको अवसरमा व्यवस्थापन समितिका अध्यक्ष चित्रबहादुर कार्की र प्रध्यानाध्यापक मनोजकुमार शर्मालाई हस्तान्तरण गरे ।

बिदेशमा कार्यरत विभिन्न मुलुकबाट आइसीटी संयोजक तथा प्रतिनिधिहरु स्कुलको वार्षिकोत्सवमा सहभागी भएका थिए । हङकङ, मकाउ, अमेरिका, बेलायत, युएइ, युरोपबाट आइसीटी भवन निर्माणका लागि १०० भन्दा बढी पूर्वविद्यार्थीहरुले आर्थिक सहयोग गरेका थिए ।

जिल्ला समन्वय समिति स्याङ्जाका अध्यक्ष सीता सुन्दासको प्रमुख आतिथ्यतामा सम्पन्न भएको उक्त कार्यक्रममा आइसीटी भवन निर्माण समितिका अर्थ संयोजक पूर्वबिद्यार्थी प्रेम गुरुङले आइसीटी भवनबाट बिद्यार्थी भाइबहिनीहरुले धेरै फाइदा लिन सकोस भन्नुभयो ।

२०३१ सालदेखि सञ्चालनमा आएको उक्त विद्यालयका लागि बनाइएको दुई कोठे नयाँ भवन सूचना प्रविधिको कक्षाका लागि भएको भूपू विद्यार्थी तथा हङकङका संयोजक आइबहादुर गुरुङले बताए ।

विद्यालयमा हाल ३ सय २२ जना छात्रा र २ सय २८ जना छात्र छन् । संस्थापक प्रधानाध्यापक यामबहादुर रानाभाटले एक लाखको अमृत आईसीटी अक्षयकोष पनि स्थापना गरेका छन् । सो अबसरमा बिद्यार्थीहरुले सांस्कृतिक कार्यक्रम समेत प्रस्तुत गरेका थिए ।