काठमाडौं, ११ भदौ, । सर्वोच्च अदालतमा आजदेखि ‘अटोमेसन’ पेसी तारिखको अभ्यास गरिएको छ । प्रधानन्यायाधीश विश्वम्भरप्रसाद श्रेष्ठले अटोमेसनमा पेसी तारिखको शुभारम्भ गरेका हुन् ।

प्रधानन्यायाधीश श्रेष्ठले प्रविधिले पक्षपात नगर्ने भन्दै न्यायालयको विश्वास बढाउन र सेवाग्राहीलाई भरपर्दो सेवा प्रदान गर्न अटोमेसनमा पेसी तारिख सुरु गरिएको बताए ।

पेसी तारिख अटोमेसनमा रिट वा मुद्दा लिएर आउने सेवाग्राहीले दर्ता भएसँगै कम्प्युटरको प्रणालीभित्रैबाट पेसीरतारिखको मिति पाउनेछन् ।

यो प्रणालीबाट पहिलो पेसी तारिख नागरिक उड्डयन प्राधिकरणविरुद्ध अनमोल फ्यासिलिटी क्लिनर्स प्रालिसहितले दायर गरेको रिटले पाएको छ । सार्वजनिक खरिद ऐनसँग सम्बन्धित रिटको पेसी आउँदो कात्तिक ७ गतेका लागि तोकिएको छ ।

अटोमेसनमा प्रवेश गरेसँगै अब फाँटमा बसेका कर्मचारीले पेसी तोक्ने अभ्यास बन्द भएको छ । फाँटमा रहेका कर्मचारीले कम्प्युटरमा इन्ट्री गरेसँगै सेवाग्राहीले पेसीको समय पाउने सर्वोच्च प्रशासनले जनाएको छ ।